Тоҷикистон дар се соли оянда бояд се Муоҳидаи дигари Созмони ҷаҳонии Меҳнатро ба тасвиб бирасонад. Ин нукта дар Созишномаи генералӣ байни Ҳукумати Ҷумҳурии Тоҷикистон, Федератсияи иттифоқҳои касабаи мустқили Тоҷикистон ва Иттиҳодияи корфармоёни Тоҷикистон зикр шудааст.
Созишномаи геннералӣ дар аввали соли 2021 бо як қарори ҳукумат аз сӯйи Эмомалӣ Раҳмон барои се сол – 2021-2023 таъйид шудааст.
Акнун бар асоси ин санад Тоҷикистон бояд то соли 2023 се Муоҳидаи дигари Созмони ҷаҳонии Меҳнат – 102 "Дар бораи меъёри ҳадди аққали таъминоти иҷтимоӣ", 167 "Дар бораи бехатарӣ ва ҳифзи меҳнат дар сохтмон" ва 183 "Дар бораи ҳифзи модар"-ро биомӯзад ва тасвиб кунад.
Ин нуктаро Иброҳим Саидзода, мудири Шуъбаи ҳуқуқи Федератсияи иттифоқҳои касабаи мустақили Тоҷикистон имрӯз дар як ҷаласаи вижа дар мавриди тавонманд кардани нақши иттифоқҳои касаба дар бахши ҳимояи ҳуқуқҳои меҳнатии корманадон зикр кард. Ин нишаст муштаракан аз сӯйи Федератсияи иттифоқҳои касабаи мустақили Тоҷикистон, иттиҳодияи ҷамъияти “Дунёи ҳуқуқ” ва Институти “ҷамъияти кушода” дар Тоҷикистон роҳандозӣ шуда буд.
Ба гуфтаи Сайидзода бар асоси ин муоҳидаҳо давлат ва дигар корфармоён дар Тоҷикистон вазифадор мешаванд, ки шароити хубтари корро барои коргарон фароҳам кунанд.
Аз ҷумла ӯ гуфт, ки тибқи талаботи Муоҳидаи 183 "Дар бораи ҳифзи модар" минбаъд корхонаҳо вазифадор мешаванд, ки барои модароне, ки кӯдаки ширхора доранд утоқи махсус ҷудо кунанд ва иҷоза диҳанд, ки модар дар давоми рӯзи корӣ чанд бора тифлашро шир бидиҳад ё аз ӯ парасторӣ кунад.
Дар Қарори Ҳукумати Тоҷикистон дар бораи таъйиди ин созишномаи генералӣ гуфта шудааст, ки Вазорати меҳнат, муҳоҷират ва шуғли аҳолии Ҷумҳурии Тоҷикистон дар ҳамкорӣ бо Федератсияи иттифоқҳои касабаи мустақил ва Иттҳодияи корфармоёни Тоҷикистон назорати иҷрои созишномаи генералиро ба роҳ монад.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
