Раиси Федератсияи муҳоҷирони Русия Вадим Коженов зикр кард, ки дар фармони нав “Дар бораи тадбирҳои муваққатӣ оид ба танзими мақоми ҳуқуқии шаҳрвандони хориҷӣ ва шахсони бешаҳрвандӣ дар Русия дар давраи бартараф намудани оқибатҳои паҳншавии сирояти нави коронавирус (COVID-19)» як қатор меъёрҳое мавҷуданд, ки ба сабти ҳуқуқҳои муҳоҷирон имкон медиҳанд.
Ба гуфтаи ӯ, дар фармонҳои пешина доир ба тамдиди муҳлати ҳузури муваққатии муҳоҷирон дар Русия чунин меъёрҳо набуданд.
“То 30 сентябри соли 2021 дар бораи ихроҷ, истирдод ва манъи вуруд қарорҳо қабул намешаванд. Ин дар фармон мушаххас зикр шудааст. Яъне агар муҳоҷир ба даст афтад, ҷаримабандӣ мешавад. Ва лаҳзаи дигар: то 30 сентябр шумо бо аризаи ба таври одӣ навишташуда метавонед ба шуъбаи масоили муҳоҷират муроҷиат намуда, ҳузури худро қонунӣ кунед”, – шарҳ додааст Коженов.
Раиси Федертсия гуфтааст, чун ихроҷ манъ шудааст, пас агар шаҳрванди хориҷӣ муддати чандин сол ғайриқонунӣ дар Русия зиндагӣ карда бошад ҳам, ҷаримабандӣ мешавад ва сарфи назар аз ин ҳама, ӯро ба қайди муҳоҷират мегузоранд.
Коженов аз ҳамаи муҳоҷирони ғайриқонунӣ даъват намудааст, ки ҳузурашонро қонунӣ кунанд, чунки ба гумони ғолиб, ин сабукӣ барои муҳоҷирон дер давом намекунад. Ҳамаи паҳлӯҳои ин масъаларо ӯ дар навори видео дар шабакаи Федератсия шарҳу тавзеҳ медиҳад.
Ёдрас мекунем, ки мувофиқи фармони нав, муҳлати ҳузури муваққатии муҳоҷирон дар Русия бидуни таҳрим то 30 сентябри соли 2021 тамдид шуд. Тибқи матни санад, агар хориҷиён ба қонуншиканӣ даст назада бошанд, онҳо то 30 сентябр ихроҷ карда намешаванд.
Аммо хориҷиёне, ки аз муассисаҳои ислоҳӣ озод мешаванд, истисно мебошанд. Ҳамчунин хориҷиёне, ки қонунгузориро дар бораи сарҳади Русия риоя накардаанд ё ба амнияти миллӣ хатар эҷод мекунанд, низ ба ин категорияи истисно дохил мешаванд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
