Директори Маркази миллии тестии Тоҷикистон Хуршед Икромӣ зимни нишасти матбуотӣ хабар дод, ки соли равон 91 ҳазору 531 довталаб барои дохилшавӣ ба макотиби олӣ ва муассисаҳои таҳсилоти миёнаи махсус дар марказ ба қайд гирифта шуданд, ки 8,8% нисбат соли пешин камтар аст.
Ба гуфтаи вай, дар кластери илмҳои табиатшиносӣ ва техникӣ боз норасоӣ ба миён омада, аз нақшаи қабул 68,6% довталабон ҳуҷҷатҳояшонро ба ихтисосҳои ин самт супоридаанд.
"Интихоби ихтисосҳо дар ин кластер сол то сол коҳиш ёфта, ба як анъанаи номақбул табдил меёбад, – гуфт Икромӣ. – Норасоӣ дар соли гузашта дар сатҳи 80% қарор гирифта, имсол фоизи довталабон ба ихтисосҳои кластери табиӣ-техникӣ ба таври назаррас коҳиш ёфт. Мутаассифона, ин воқеият аст".
Тибқи маълумоти роҳбари Марказ, имсол таваҷҷӯҳи довталабон ба ихтисосҳои кластери ҷуғрофия ва иқтисод низ ба таври қобили мулоҳиза кам шудааст.
"Агар соли гузашта нақшаи қабули ҳуҷҷатҳо аз рӯи ин ихтисос иҷро шуда бошад, пас имсол шумори хоҳишмандони ин ихтисосҳо то 80 фоизи нақша поин рафт", – гуфт ӯ.
Дар се кластери дигар, ба гуфтаи Икромӣ, довталабон нисбат ба нақшаи қабул зиёдтар сабти ном шудаанд: "Тиб ва биология" – 150%, "Ҷомеашиносӣ ва ҳуқуқ" – 130%, "Филология, педагогика ва санъат" – 118 %. Дар асоси синфи 9 дар кластери тиббӣ (ҳамшираҳои шафқат ва фельдшерҳо) рекорд гузошта шуд – 257% аз нақшаи қабул.
Ба саволи он ки оё коҳиши теъдоди довталабон имсол ба қонуни нави хизмати ҳарбӣ марбут аст, чунки қаблан шумораи муайяни ҷавонон ба макоти олӣ дохил мешуданд, то ба хидмат дар артиш нараванд, Хуршед Икромӣ посух дод, ки барои ин зарур аст, ки дар байни довталабон пурсиш гузаронида шавад.
"Чунин назарсанҷӣ лозим аст ва агар имкон даст диҳад, соли оянда мо онро баргузор мекунем", – ваъда дод ӯ.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
