Ҳашт нафар мардон, ки дар содир намудани ҷиноятҳои гуногун гумонбар шудаву дар Русия паноҳ бурда буданд, ба Тоҷикистон истирдод шуданд. Онҳо ба куштор, қаллобӣ, фирор ва нашъаҷаллобӣ гумонбар дониста мешаванд.
Ҳамаи онҳо аз ҷониби Тоҷикистон мавриди пайгард эълон шуда, пас аз муқаррар кардани маҳалли будубоши онҳо дар қаламрави Русия, дархостҳои истирдоди айбдоршавандагон фиристода шуданд, ки ҷониби Русия онҳоро қонеъ кард.
Бино ба маълумоти Додситонии кулли Русия, қарорҳо дар бораи истирдоди ин шахсон эътибори қонунӣ пайдо карда, аз ин рӯ, ба Хадамоти федералии иҷрои ҷазо супориш дода шудааст, ки онҳоро интиқол диҳанд.
Масъалаи интиқоли гумонбаршудагон дар парвандаҳои ҷиноӣ вобаста ба вазъи эпидемиологӣ ва паҳншавии сирояти коронавирус мушкил шуда буд.
Ҳамроҳи ҳайати қаровулони махсус ва бо риояи чораҳои зарурии амниятӣ айбдоршавандагон ба ихтиёри мақомоти ҳифзи ҳуқуқи Тоҷикистон супурда шуданд.
Дар рӯйхати афроди истирдодшуда Насратшо Ҷонмирзоев қарор дорад. Вай дар тирандозӣ ба мошини кормандони ҳифзи ҳуқуқ аз автомат дар моҳи июли соли 1996 дар шаҳри Хоруғ айбдор мешавад. Дар натиҷа сардори шӯъбаи кофтукови ҷиноии Раёсати корҳои дохилии шаҳри Хоруғ, корманди милисаи ҳамин бахш, коршиноси судӣ-тиббӣ ва як сокини маҳаллӣ кушта шуданд.
Икромҷон Боронов ба таҳияи нақшаи фурӯш ва қочоқи маводи мухаддир ба Русия ҳамроҳ бо шариконаш дар моҳи сентябри соли 2009 муттаҳам мешавад.
«Аз ҷумла, яке аз ҳаммаслакони ӯ занеро пайдо кард, ки ба ивази мукофотпулӣ мебоист дар либоси фарзандаш маводи нашъадор – 416 грамм героинро интиқол диҳад. Боронов амали шариконро тавассути телефон назорат карда, мебоист занро дар Русия пешвоз гирад”, – хабар медиҳад дафтари матбуоти Прокуратураи генералии ФР.
Аммо ҳангоми бозрасии гумрукӣ дар фурудгоҳи байналмилалии "Хуҷанд" зан боздошт шуд.
Боз як нафари истирдодшуда – Фирӯз Сафаров ба он муттаҳам мешавад, ки моҳи сентябри соли 2012 тибқи созиши пешакӣ бо дигар шахсон дар шаҳри Душанбе ғайриқонунӣ 1990 грамм маводи мухаддирро ба даст оварда, нигоҳдорӣ ва интиқол додааст.
Мирзоалӣ Давлатов ба дуздии амвол дар моҳи ноябри соли 2019 дар ноҳияи Рӯдакӣ ба маблағи 78 ҳазору 700 сомонӣ дар ҳамдастӣ бо шахсони дигар айбдор дониста мешавад.
Даврон Бердиев ба гумонбарӣ дар ҷурми худсарона тарк кардани қисми низомии 0201 Сарраёсати Қӯшунҳои сарҳадии КДАМ ҶТ дар вилояти Суғд ба муддати як моҳ ҳангоми дар вазифаи старшинаи ротаи посбонӣ ва таъминот қарор доштанаш дар ин қисм истирдод мешавад.
Эмомалӣ Салимов ба он муттаҳам дониста мешавад, ки ба хидмати сарбозӣ даъват шуда, онро дар қисми низомии 5453 Раёсати қӯшунҳои дохилии Вазорати корҳои дохилии Тоҷикистон адо мекард ва замоне, ки ба рухсатии кӯтоҳмуддат меравад, пас аз анҷоми муҳлати он бидуни сабабҳои узрнок дигар ба қисми ҳарбӣ ҳозир нагардида, нопадид мешавад.
Ҳамчунин Акмал Юнусов, ки ба қаллобии калон муттаҳам дониста мешавад ва Идрис Назаров ба гумони гунаҳкорӣ дар латукӯби ноболиғ аз ҳиссиёти авбошӣ истирдод шуданд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
