Дар шаҳри Нижнийи Новогорди Русия роҳбари диаспораи тоҷикон, раиси ташкилоти “Умед”-и ин шаҳр Мутрибшо Мирзоев дар синни 61-солагӣ аз олам даргузашт, хабар медиҳад нашрияи «Аргументы и Факты в Нижнем Новгороде».
Раиси шаҳри Нижний Новгород Юрий Шалабаев ба оила ва намояндагони диаспора изҳори тасаллият кардааст.
"Тӯли солҳои зиёд Мутрибшо Юсуфшоевич иштирокчии фаъоли ҳаёти ҷамъиятии шаҳр буд, барои таҳкими муносибатҳои байни миллатҳо корҳои зиёдеро анҷом дод", – таъкид кардааст шаҳрдори Нижний Новгород.
Мутрибшо Мирзоев 15 сентябри соли 1960 дар Тоҷикистон таваллуд шудааст. Дар Кстовои вилояти Горкий хизмати ҳарбиро анҷом дода, сипас дар омӯзишгоҳи техникии №20-и Горкий таҳсил кардааст. Дар корхонаи авиатсионии ба номи Серго Орҷоникидзе таҷрибаи кор омӯхта, баъдан дар ин ҷо кор кардааст. Соли 1993 аз кор рафта, ба тиҷорат машғул шуд.
Роҳбари диаспораи тоҷикон дар Нижний Новгород ва узви гуруҳи корӣ оид ба муносибатҳои байнулмилалии Шӯрои байниконфессиалӣ дар назди маъмурияти шаҳрдорӣ буд.
Ҳайати кормандони гурӯҳи расонаҳои «Азия-Плюс» ба наздикону пайвандони марҳум ҳамдардии амиқ изҳор дошта, ба онҳо аз даргоҳи Худованд сабри ҷамил металабанд!
