Мадина Мамадҷонова дар оромгоҳи Сариосёи Душанбе ба хок супурда мешавад. Хабарнигори "Азия-Плюс" аз маросими видоъ бо Мадина Мамадҷонова, аз манзили зисташон, воқеъ дар кӯчаи Гурминҷ Завқибеков хабар медиҳад, ки ин ҷо наздикону пайвандон ва бархе фаъолони ҷомеаи шаҳрвандӣ барои видоъ омадаанд.
Намози ҷаноза дар масҷиди маҳалли Сариосиё вақти намози пешин хонда мешавад.
Мадина Мамадҷонова баъди сеюниммоҳи беҳушӣ, асри 15-уми декабр дар беморхонаи шаҳраки Шифобахш, маървсум ба "Қарияи Боло" даргузашт.
Даргузашти Мадина дар ҳолест, ки ҳамагӣ ду рӯз пеш, рӯзи 14-уми декабр Додгоҳи олӣ Парвиз (Лутфулло) Давлатов яке аз гумонбарони қазияи “паврвандаи Мадина”-ро ба 8 соли зиндон маҳкум кард. Аммо бар асоси татбиқи шудани Қонуни афви моҳи сентябр ҳукми ӯ то 5 солу 4 моҳ кам карда шуд. Дар ин бора яке аз наздикони ӯ ба “Азия- Плюс” хабар дода буд.
Қазияи Мадина Маҳмадҷонова, ки сеюним моҳ дар кома ё ҳолати беҳушӣ қарор дошт, яке аз парвандаҳои пурсарусадо дар як соли охир ба шумор меравад, ки ба он раисҷумҳури Тоҷикистон Эмомалӣ Раҳмон ва раиси Маҷлиси миллӣ Рустами Эмомалӣ таваҷҷуҳ карда буданд.
Мадина Мамадҷонова 25 августи соли равон ғайб зада, баъди 14 соат бо ҷароҳатҳои вазнин ба бемористон интиқол ёфта буд. Пизишкон гуфта буданд, ки эҳтимол ӯро нафасгир кардаанд ва аз нарасидани ҳаво мағзи сараш осеб дидааст.
Охири моҳи октбяр фаъолони ҷомеаи шаҳрвандӣ ба унвони раиси шаҳри Душанбе, додситони кулл ва вазири корҳои дохилии Тоҷикистон муроҷиатнома навишта, хостори одилона тафтиш шудани парвандаи Мадина шуда буданданд.
Рустами Эмомалӣ «парвандаи Мадина»-ро таҳти назорати шахсӣ гирифта, бо дастури ӯ Додситонии кул ва Вазорати умури дохила ба санҷиши дубораи ҳолати кор оғоз карданд.
Рӯзи 1 ноябри соли равон Додситонии кулли Тоҷикистон бо нашри иттилоияи расмӣ хабар дод, ки нисбати Азиза Давлатова ва шавҳараш Лутфулло Давлатов, ки ба латукӯби Мадина Мамаҷонова гумонбар дониста мешаванд, парвандаи ҷиноятӣ боз кард. Аввалӣ барои қасди одамкушӣ ва дуввумӣ барои азобу уқубат ба ҳабс гирифта шуданд.
Дар Telegram, Facebook, Instagram, OK ва ВК бо мо бимонед.
Лутфан, хабари муҳим, суол ва аксу видеоҳои ҷолибро ба Asia-Plus тавассути Viber, Telegram, Whatsapp, Imo ба рақами +992 93 792 42 45 фиристед.
