Вакилони парлумони Точикистон дар ҷаласаи имрӯзаи Маҷлиси намояндагон се созишномаи низомӣ миёни Тоҷикистону Ӯзбекистонро тасвиб карданд. Ин се созишнома миёни вазоратҳои дифои ду кишвар дар бахшҳои муҳим, аз ҷумла кашф ё разведкаи низомӣ мебошанд.
Ду созишномаи дигар, яке дар бахши истифодаи ҳарими ҳавоӣ ва аэродромҳо аз сӯйи ҳавопаймоҳои ҳавонавардии давлатӣ дар ҳолатҳои рафънопазир ё форс-мажор ва дигаре дар бахши мудофиаи зиддиҳавоӣ мебошанд.
Вазири дифои Тоҷикистон Шералӣ Мирзо ҷузъиёти созишномаи ҳамкорӣ дар самти иктишофи ҳарбӣ байни ду кишварро ба хабарнигорон шарҳ надод, танҳо гуфт, “он чӣ ҳаст, ҳамаашро дар назди вакилон гуфтам”.
Ӯ дар шарҳи созишнома дар ҳузури вакилон гуфт, он бо назардошти болоравии таҳдиду хатарҳои минтақавӣ, аз ҷумла густариши гурӯҳҳои террористиву экстримистӣ дар минатқа ба тасвиб расида, амалигардонии он ба манфиати таъмини амнияти милии ду кишвар мебошад.
Номбурда гуфт, дар доираи созишнома анҷоми корҳои тадорукотӣ ва баргузории тамринҳои муштарак, табодули таҷриба ва маълумот дар бахши иктишофи ҳарбӣ пешбинӣ шудааст.
Дар баробари созишномаи ҳамкории разведкаи ҳарбӣ байни Тоҷикистон ва Ӯзбекистон ҳамчунин, созишномаи ҳамкории мудофиаи зиддиҳавоӣ низ аз ҷониби вакилони тоҷик ба тасвиб расид.
Ба гуфтаи вазири дифои Тоҷикистон он ҳамкории ҷонибҳоро дар самт мубодилаи иттилоот дар мавриди вазъи фазои ҳавоӣ, расонидани ёрӣ ба ҳавопаймоҳо дар ҳолатҳои рафънопазир, мубдилаи таҷриба дар соҳаи ҳавонавардӣ ва мудофиаи зиддиҳавоӣ, тайёрии мушатарки қушунҳои мақомоти идоракунии ҳарбӣ ва омода намудни кадрҳоро пешбинӣ намудааст.
Вазири тоҷик ҳамзамон гуфт, дар доираи созишнома ҳамкории якҷояи навбатдорони мудофиаи зиддиҳавоии тарафҳо оид ба назорат ва танзими фазои ҳавоӣ ба роҳ монда мешавад.
Ба гуфтаи вазири дифои Тоҷикистон созишномаи мудофиаи зиддиҳавоӣ имкон медиҳад, бехатарии парвози ҳавопаймоҳо ва чархболҳои ҷангию нақлиётии қувваҳои мусаллаҳ ва мақомоти ҳифзи ҳуқуқи Тоҷикистону Ӯзбекистон ҳангоми гирифтори садама, ҳолатҳои табиию техногенӣ ва дигар фалокатҳои ғаричашмдошт (форс-мажор), таъмин карда шавад.
Дар чанд соли ахир Тоҷикистону Ӯзбекистон равобиташонро ба ҳадде пеш бурданд, ки ҳоло аз ҳамкорони муҳими на танҳо иқтисодӣ, балки низомиву истихборотӣ шуданд. Ин дар ҳолест, ки то замони ба қудрат расидани Шавкат Мирзиёев ҳар ду кишвар борҳо аз боздшту кашфи ҷосусҳо хабар дода буданд.
Рушди ҳамкории ҳарбию фаннии ин ду кишварҳои ҳамсоя пас аз сафари Шавкат Мирзиёев ба Душанбе дар моҳи марти соли 2018 оғоз ёфт. Он замон Душанбе ва Тошканд бори нахуст дар таърихи равобити дуҷониба се созишномаи байнидавлатиро дар бахши низомӣ ба имзо расониданд.
То ин замон ин ду кишвар, солҳои тӯлонӣ амалан дар ҳолати ҷанги сард қарор доштанд. Ҳаракати ҳавоӣ миёни кишварҳо қатъ шуда буд, хатсайрҳои автобус манъ ва қисме аз роҳи оҳан барҳам ва миёни ду кишвар режими раводид шуда буд.
ИЗОБРАЖЕНИЕ
Ҳамчунин, сар аз оғози солҳои 90-ум бо ташаббуси Тошканд қитъаҳои ҷудогонаи сарҳади Ӯзбекистону Тоҷикистон минакорӣ шуданд, ки тибқи маълумоти Маркази миллии масоили минаҳои Тоҷикистон дар давоми беш аз соли ахир аз таркиши ин минаҳо 374 нафар шаҳрванди Тоҷикистон ҳалок ва 485 нафари дигар захмӣ шуданд. Ҳамчунин, дар ҷараёни безараргардонии минаҳо 20 мутахассиси ин соҳа (сапёрҳо) захмӣ ва 2 нафари онҳо ҳалок шуданд.
Чанд сол пештар, қабл аз хуб шудани равобит, Тоҷикистон аз боздошти ду шаҳрванди Ӯзбекистон хабар дода буд, ки қасд доштанд сарбанд ва иншооти дигари НБО “Роғун”-ро битарконанд.
Ӯзбекистон аз тарҳову лоиҳаҳои бузрги Тоҷикистон борҳо ба минбарҳову созмонҳои ҷаҳонӣ шикоят бурда буд. Аз ҷумла кишварҳи ҳамсоя он замон вуҷуди Ширкати алюминийи тоҷик “Талко”-ро дар марзи худаш ва бунёди “Роғун”-ро даледи офаридани фоҷиаҳои калони экологӣ барои худ ва кишварҳои дигари минтақа унвон карда буд.
Дар Telegram, Facebook, Instagram, OK ва ВК бо мо бимонед.
Лутфан, хабари муҳим, суол ва аксу видеоҳои ҷолибро ба Asia-Plus тавассути Viber, Telegram, Whatsapp, Imo ба рақами +992 93 792 42 45 фиристед.
