Чорабиниҳои идона дар сатҳи ҷумҳуриявӣ ба муносибати ҷашни Наврӯз имсол дар ноҳияи Балхии вилояти Хатлон баргузор шуда, иштироки сарвари давлат Эмомалӣ Раҳмон дар онҳо дар назар аст.
Хатлон ба пешвози меҳмонон омодагӣ мегирад
Чорабинии асосии ҷашнӣ дар варзишгоҳи нав доир мегардад, ки он бо маблағгузории соҳибкорони маҳаллӣ сохта шуда, барои 15 ҳазор нафар тамошобинон пешбинӣ шудааст, хабар доданд ба “Азия-Плюс” аз Раёсати фарҳанги вилояти Хатлон.
Дар намоишномаи театришуда 15 ҳазор нафар иштирок мекунанд.
Дар вилояти Хатлон аз аввали моҳи март инҷониб чорабиниҳо бахшида ба ҷашни Наврӯз ҷараён доранд. Муддати чанд рӯз мешавад, ки дар вилоят сайругаштҳо (экскурсияҳо)-и наврасону ҷавонон ба иншооти дорои арзиши таърихиву фарҳангии Хатлон, аз ҷумла мавзеи “Тахти сангин” дар ноҳияи Қубодиён баргузор мешаванд.
Озмуни вилоятии “Маликаи Наврӯз” ҷамъбаст шуда, ғолиби он дар чорабиниҳои Наврӯз иштирок мекунад.
Рӯзи 21 март дар майдони “Наврӯзгоҳ” дар маркази ноҳияи Балхӣ озмуни маснуоти нонӣ ва рамзи Наврӯз – “Ҳафт син” ва “Ҳафт шин” барпо мешавад.
Худи ҳамин рӯз дар ин ҷо мусобиқаҳои куштииини миллӣ (гӯштингирӣ), бузкашӣ ва пойгаи аспдавонӣ баргузор мешаванд.
Аз 22 то 28 март чунин чорабиниву мусобиқаҳо дар ҳамаи шаҳру навоҳии вилоят доир гардида, дар боғҳо консерту сайругаштҳои оммавӣ баргузор мешаванд.
ИЗОБРАЖЕНИЕ
Консертҳо дар вилояти Суғд
Чорабинии идона ба ифтихори Наврӯз дар сатҳи вилоят рӯзи 20 март дар шаҳри Хуҷанд доир мегардад. Он дар “Кохи Рӯдакӣ” баргузор шуда, дар барномаи фарҳангӣ сарояндагони маъруф ва дастаҳои рақсии минтақа иштирок мекунанд. Дар ҳамин ҷо намоишгоҳ низ барпо мешавад.
Рӯзи 21 март дар Кохи фарҳанги “Суғдиён” дар шаҳри Хуҷанд низ барномаи консертӣ намоиш дода мешавад.
Рӯзҳои ҷашни Наврӯз дар тамоми шаҳру навоҳии вилояти Суғд сайругаштҳои оммавӣ ва мусобиқаҳои куштигирӣ дар назар аст.
Рӯзи 22 март дар ипподроми ноҳияи Бобоҷон Ғафуров соати 9:00 мусобиқаи бузкашӣ оғоз мегардад, ки дар он намояндагони ҳамаи шаҳру навоҳии вилояти Суғд ширкат хоҳанд варзид.
Ёдрас мекунем, ки чорабиниҳои идона ба муносибати ҷашни Наврӯз дар пойтахт рӯзҳои 21,22,23 ва 24 март дар чор ноҳияи шаҳр баргузор мешавад.
Дар Telegram, Facebook, Instagram, OK ва ВК бо мо бимонед.
Лутфан, хабари муҳим, суол ва аксу видеоҳои ҷолибро ба Asia-Plus тавассути Viber, Telegram, Whatsapp, Imo ба рақами +992 93 792 42 45 фиристед.
