Бар асоси иттилои дарёфтӣ, номи ҳунарманд ва овозхони шинохта Афзалшоҳ Шодиро аз рӯйхати овозхонҳое, ки бояд дар як барномаи консертӣ дар доираи сафари Эмомалӣ Раҳмон, раисҷумҳури Тоҷикистон ба шаҳри Панҷакент ҳунарнамоӣ кунанд, хат задаанд. Инро масъулони баргузории ин маҳфил ба “Азия-Плюс” низ таъйид карданд.
Дар шаҳри Панҷакент берун кардани Афзалшоҳ Шодиро аз ин барномаи консертӣ, мухлисони ҳунараш бисёр ба сахтӣ қабул кардаанд ва онҳо аз ин ҳато дар шабакаҳои иҷтимоӣ изҳорӣ нигаронӣ мекунанд.
Дар назар аст, то 10-уми апрел Эмомалӣ Раҳмон ба шаҳри Панҷакент сафар кунад. Ҳарчанд ҳадафи ин сафар то кунун эълон нашудааст, аммо омодагиҳо ба чорабиниҳои гуногун, аз ҷумла барномаҳои фарҳангӣ дар ҷараён аст.
Худи Афзалшоҳ Шодӣ, дар як тамоси кӯтоҳи телефонӣ ба мо гуфт, ки ба ман супориш шуда буд, ки ягон суруду оҳанги нав омода намоям.
“Ман тайёр кардам. Дар аввал гуфтанд, ки суруд олиҷаноб аст, гузашт. Ҳатто шоир Озарахш дар ҳамонҷо буд ва ба ӯ ҳам писанд омад. Вале намедонам аз чӣ сабаб бошад, ки дигар баромади маро гирифтаанд. Ман бо касе ягон мушкил надорам. Солҳост, ки дар чорабиниҳои фарҳангӣ ширкат карда истодаам. Ҳамеша ба халқу Ватан хидмат мекунам».
Дар ҳамин ҳол Ориф Набиев, саркоргардони чорабинӣ ҳам, дар рӯйхат набудани ҳунарнамоии Афзалшоҳ Шодиро тасдиқ кард ва гуфт, ки мо хостем бештар такя ба ҷавонон кунем.
«Дар барномаи мазкур аз ҳама гӯшаи вилояти Суғд овозхонҳо суруд иҷро мекунанд. Аз Исфара, Хуҷанд, аз Яғноб аз Панҷакент. Ин чорабинии умумивилоятӣ аст» – гуфт Ориф Набиев.
Вале Обид Назаров, муовини аввали вазири фарҳанги Ҷумҳурии Тоҷикистон мегӯяд, ки ҳар лаҳза ҳолат тағйир ёфтанаш мумкин.
«Ростӣ ман суруди омодакардаи Афзалшоҳро гӯш кардам. Воқеан хоҳиши мухлисони Афзалшоро вазири мо ҳам шунидаанд. Мӯҳтарам вазир гуфтанд, ки ман талаби мухлисони овозхонро ба раиси вилоят расонам. Ҳоло ман пешниҳодҳоямро ба раиси вилоят изҳор медорам»,-мегӯяд муовини вазир.
Дар ҳамин ҳол, бархе ах ҳаводорони ҳунари ин овозхон умедворӣ мекунанд, ки бояд саҳна барои ҳунармандоне, ки мардум онҳоро эҳтиром мекунад, танг карда нашавад.
Самад Самадов, сокини Панҷакент ва яке аз ҳаводорони Афзалшоҳ Шодӣ ба ин бовар аст, ки шояд масъулин ба ӯ навбат диҳанд ва бояд дар ин чорабинӣ баромад кунад. Зеро мо ҳазорон ҳаводораш интизори иҷрои Ҳоҷӣ Афзалшоҳ ҳастем.
Акнун маълум нест, ки ин мавзуъ чӣ гуна ҳал мешавад, тавре муовини аввали вазири фарҳанг мегӯяд, онҳо ин мавзуъро бо раиси вилояти Суғд Раҷаббой Аҳмадзода дар ҷараён мегузоранд.
Дар Telegram, Facebook, Instagram, OK ва ВК бо мо бимонед.
Лутфан, хабари муҳим, суол ва аксу видеоҳои ҷолибро ба Asia-Plus тавассути Viber, Telegram, Whatsapp, Imo ба рақами +992 93 792 42 45 фиристед.
