Ҳаҷми муомилоти моли хориҷии Тоҷикистон дар нимсолаи аввали соли ҷорӣ 1 млрд 677 млн долларро ташкил дод, хабар медиҳад Агентии омори ҷумҳурӣ.
Дар муқоиса бо се моҳи аввали соли 2021 гардиши моли кишвар дар семоҳаи аввали имсол ба андозаи 6,5% (117 млн доллар) кам шуд.
Тавозуни савдо (фарқият байни содирот ва воридот) манфӣ буда, 737 млн долларро ташкил медиҳад.
Ҳаҷми содирот дар семоҳаи аввали соли ҷорӣ 470 млн долларро ташкил додааст, ки 50,5% ё худ 480 млн доллар камтар нисбат ба ҳамин давраи соли 2021 мебошад.
Беш аз 38% аз ҳаҷми умумии содирот аз Тоҷикистон ба маҳсулоти минералӣ (ашёи хоми гуногун), ҳудуди 22% – ба маҳсулоти ва маснуоти нассоҷӣ рост омада, ҳиссаи сангҳо ва фулузоти қиматбаҳо дар сохтори содирот аз 75% дар ҳамин давраи соли гузашта то ба 16% дар ин давра коҳиш ёфтааст.
Ҳаҷми воридот дар семоҳаи аввал дар муоқиса бо моҳҳои январ-марти соли 2021 баръакс 43% (363 млн доллар) афзудааст.
Дар сохтори воридот маҳсулоти минералӣ (20% дар ҳаҷми умумии воридот), мошин ва таҷҳизот (12,2%), фулузоти арзон ва маснуот аз он (11,1%) ва маҳсулоти саноати кимиё (10,4%) афзалият доранд.
Дар семоҳаи аввали имсол Тоҷикистон бо 94 кишвари дунё додугирифти дуҷониба анҷом додааст. Дар моҳҳои март-январи соли 2021 низ шумори ин кишварҳо ҳамин миқдор буд.
Шарики асосии тиҷоратии Тоҷикистон дар соли ҷорӣ Русия мебошад, ки ҳаҷми савдои дуҷониба бо он дар се моҳ қариб 365 млн доллар (22% дар ҳаҷми умумии гардиши мол)-ро ташкил медиҳад. Дар ҳамин давраи соли гузашта шарики асосии тиҷоратии Тоҷикистон Швейтсария маҳсуб меёфт, ки бо гардиши моли дуҷонибаи 721 млн доллар 40% аз ҳаҷми умумии савдои хориҷии ҷумҳурӣ ба ин кишвар рост меомад.
Ба сегонаи асосии шарикони тиҷоратии Тоҷикистон дар соли равон инчунин Қазоқистон (354 млн доллар) ва Чин (344 млн доллар) шомиланд.
Ҳаҷми умумии савдо бо Русия, Қазоқистон ва Чин дар семоҳаи авал зиёда аз 63% аз ҳаҷми умумии муомилоти моли хориҷии Тоҷикистонро ташкил дод.
