Оҷонсии зиддифасоди Тоҷикистон Ҷамшед Ғаффоров, як корманди Нозироти андоз дар шаҳри Ваҳдатро бо иттиҳоми талаби пора дар ҳаҷми 10 ҳазор сомонӣ боздошт намудааст.
Маркази матбуотии Оҷонсӣ дар шарҳи хабари боздошти ӯ навиштааст, ки мутахассиси пешбари гурӯҳи хизматрасонӣ бо шахсони ҳуқуқии шуъбаи хизматрасонӣ ба андозсупорандагони Нозироти андоз дар шаҳри Ваҳдат Ғаффоров Ҷамшед Ҳакимович аз шаҳрванд “А” барои қатъ намудани фаъолияти соҳибкорӣ, 10000 сомонӣ талаб намуда, аз маблағи талабнамудааш 5000 сомониашро гирифта, боз овардани боқимонда маблағи 5000 сомониро талаб намуда истодааст.
Ин ниҳод гуфтааст, ки худи шаҳрванд “А” аз Оҷонсии зиддифасод хоҳиш кардааст, ки нисбати ин нозири андоз чораи қонунӣ андешида шавад.
– Зимни гузаронидани чорабиниҳои оперативӣ-тафтишотӣ Ғаффоров Ҷ.Ҳ. баъди аз шаҳрванд “А” гирифтани маблағи 5000 сомонӣ дар утоқи кориаш дастгир карда шуда, маблағи мазкур аз ӯ ёфта гирифта шуд, – навиштааст Оҷонсии зиддифасоди Тоҷикистон.
Нисбати Ҷамшед Ғаффоров бо моддаи 319 қисми 1 Кодекси ҷиноятии Ҷумҳурии Тоҷикистон (гирифтани пора) парвандаи ҷиноятӣ оғоз гардида, , бо тасдиқи фикри айбдоркунӣ ба додгоҳ ирсол гардид.
Дар асоси ин модда ба Ғаффоров ҷарима ба андозаи аз се ҳазору шашсаду панҷоҳ то нуҳ ҳазору яксаду бисту панҷ нишондиҳанда барои ҳисобҳо (233 ҳазору 600 то 584 ҳазор сомонӣ) ё то се соли зиндон таҳдид мекунад.
Дар ҳоли ҳозир назари Ғаффоров ва наздикони ӯ дар мавриди ин иттиҳом ба расонаҳо маълум нест.
Талаби 10 ҳазор сомонӣ барои қатъи фаъолияти соҳибкорӣ аз ҷониби як корманди мақомоти андоз дар ҳолест, ки бар асоси омори расмӣ се моҳи аввали соли 2022 дар Тоҷикистон беш аз 7,3 ҳазор субъекти хоҷагидорӣ фаъолияташонро қатъ кардаанд.
