Сарраёсати маорифи шаҳри Душанбе бо нашри як эълон, аз волидайне, ки имсол фарзандонашон бори аввал ба мактабҳои миёна барои таҳсил мераванд, хоҳиш кардааст, ки дар ҳолати талаби маблағ аз ҷониби масъулин ба шӯъбаҳои маориф муроҷиат кунанд.
Бино ба иттилои Сарраёсати маорифи шаҳри Душанбе, қабули хонандагони синфҳои якум дар мактабҳои давлатӣ ройгон мебошад.
Асомиддин Бобозода, сардори Раёсати муассисаҳои таҳсилоти томактабӣ ва миёнаи умумии Сарраёсати маорифи шаҳри Душанбе дар суҳбат ба «Азия-Плюс» гуфт, ки то имрӯз дар мавриди масъалаи мазкур аз ҷониби волидайн муроҷиат ё шикояте ба Раёсати маориф ворид нашудааст. Ба гуфтаи ӯ, ин танҳо огоҳӣ буда, мақсад аз ин эълон пешгирии омилҳои коррупсионӣ мебошад.
ИЗОБРАЖЕНИЕ
«То имрӯз шикояте ворид нашудааст ва дар ҳолати ворид шудан ва бо факту далел пешниҳод намудани ҳолат, дар якҷоягӣ бо сохторҳои дахлдор чораандешӣ карда мешавад . Ҳамзамон, ҳангоми аз ҷониби масъулони муассисаҳои таълимии Душанбе талаб намудани маблағ барои қабули кӯдакон ба синфи якум, волидон бояд аз масъулон расид барои супоридани маблағ талаб кунанд», – илова намуд Бобозода.
Номбурда инчунин гуфт, ки дар ҳолати муроҷиати шикоят аз ҷониби волидон, шахсияти онҳо махфӣ нигоҳ дошта мешавад ва онҳо метавонанд арзу шикояти худро тариқи телефони боварии Сарраёсати маорифи шаҳри Душанбе 2213092 ё почтаи электтронии [email protected] пешниҳод намоянд .
Бояд гуфт, ки дар Тоҷикистон мувофиқи қонун “Дар бораи маориф”, ба синфи 1-ум танҳо кӯдаконе қабул карда мешаванд, ки ба синни 7-солагӣ расидаанд.
Имсол ба синфи якум кӯдаконе, ки то 31 декабри соли 2015 таваллуд шудаанд, қабул мешаванд. Агар кӯдак 1 январи соли 2016 таваллуд шуда бошад, ӯро ба ба синфи якум қабул намекунанд. Муқаррароти зикршуда ҳам ба муассисаҳои таҳсилоти умумии давлатӣ ва ҳам хусусӣ дахл дорад.
Хотиррасон мекунем, ки дар Тоҷикистон аз 1 август дар мактабҳо дарси мутобиқсозӣ барои хонандагони синфҳои 1-ум оғоз мешавад. Давраи машғулиятҳои омодагӣ ба мактаб то 20 август идома ёфта, дарсҳои пурра аз 1 сентябр оғоз мешаванд.
