Роҳбари Толибон* бо фармоне барои вилояти Панҷшер ва вулусволиҳои Андаробу Бағлон масъули низомии нав таъйин кард. Дар ин бора Забеҳуллоҳ Муҷоҳид, сухангӯи Толибон* хабар додааст.
Забеҳуллоҳ Муҷоҳид, рӯзи якшанбе, 22 август бо нашри фармони Мулло Ҳайбатулло Охундзода, раҳбари ин гурӯҳ дар Твиттери худ гуфтааст, ки мулло Абдулқаюм Зокир, масъули низомии умумии вилояти Панҷшер ва Андаробу Бағлон таъйин шудааст. Ӯ зодаи вилояти Ҳилманд буда, қаблан дар вазифаи муовини сарпарасти вазорати мулофиаи Толибон* фаъолият кардааст.
Ҳамчунон, бар асоси ин фармон Мулло Муҳаммад Тайиб Ҳаққонӣ ба ҳайси қумондони амнияи Панҷшер таъйин шудааст.
Ин таъйинот дар ҳоле анҷом мешавад, ки ахиран даргириҳо миёни Толибон ва нерӯҳои Ҷабҳаи муқовамати миллӣ дар Панҷшер, Бағлон ва Тахор афзоиш ёфта, ҷонибҳо аз кушта шудан ва асир афтодани даҳҳо ҷанговари рақиб иттилоъ медиҳанд.
Аз ҷумла, Ҷабҳаи муқовамати миллӣ ахиран эълон кард, ки дар як задухӯрд бо ҷанговарони толиб 40 нафари онҳоро ба асорат гирифтанд. Иттилое, ки Толибон* тасдиқ накарданд.
*Дар Тоҷикистон гурӯҳи террористӣ эътироф шудааст
Ҳар он чи дар Афғонистон рух медиҳад, метавонед мустақиман дар сужаи мо – "Афғонистон" бихонед.
