Имсол ба мактабҳои олии ҷумҳурӣ 43 998 нафар довталаб, ба коллеҷҳо бо маълумоти синфи 11-ум – 15 740 ва бо маълумоти асосии умумӣ (синфи 9-ум) – 7 745 довталаб дохил шуданд.
Тибқи маълумоти Маркази миллии тестӣ, самтҳои талабгорашон нисбатан камтар барои довталабони тоҷик ихтисосҳои кластери якум ва дуюм (табиӣ-техникӣ, иқтисод ва ҷуғрофия) буда, нисбатан серталаб кластери панҷум (тиб, биология ва варзиш) мебошад.
Писандидатарин самтҳо барои тоҷикистониёни ҷавон “Эпидемиология”, “Андозбандӣ” ва “Ташхиси судӣ” буда, озмун дар ин самтҳо барои 1 ҷой мутаносибан 364 нафар, 388 нафар ва 364 нафарро ташкил додааст.
Дар ҳамин ҳол, аз рӯи шумори довталабон ихтисосҳо дар бахши тиббӣ пешсафанд: “Кори табобатӣ” – зиёда аз 16 ҳазор нафар, “Педиатрия” – беш аз 12 ҳазор нафар.
Ҳамчунин дар таҳсили пулакӣ интихоби довталабон бештар ба таҳсили рӯзонаи риштаи “Кори табобатӣ” – 8 252 нафар рост омадааст.
Қобили зикр аст, ки бо назардошти дархостҳои довталабон ба ихтисосҳо, сокинони Тоҷикистон бештар ба Донишгоҳи давлатии тиббии Тоҷикистон ва Донишгоҳи миллии Тоҷикистон ҳуҷҷат месупоранд.
Чанде пеш”Азия-Плюс” дар кӯчаҳои пойтахт дар мавриди кадом кишварҳои хориҷиро интихоб кардани довталабони тоҷик барои таҳсил назарпурсии видеоӣ гузаронид. Тавре ки интизорӣ мерафт, дар зинаи аввал Русия қарор гирифт. Довталабони мо инчунин дар Олмон, ИМА, Кипр ва Ӯзбекистони ҳамсоя низ таҳсил кардан мехоҳанд.
