“Шумори квотаҳое, ки ба донишҷӯён аз Тоҷикистон ҷиҳати таҳсил дар макотиби олии Русия имкон медиҳад, соли хониши оянда зиёд карда мешавад”, – изҳор дошт президенти Русия Владимир Путин дар маросими ифтитоҳи 5 мактаби нави таҳсилашон бо забони русӣ дар Тоҷикистон, ки тариқи алоқаи видеоӣ баргузор шуд.
“Ҳамасола ба шаҳрвандони Тоҷикистон имкон дода мешавад, ки аз ҳисоби буҷети Русия дар мактабҳои олии Русия таҳсил кунанд. Барои ин пулро дареғ доштан нашояд. Ин кишвар ва мардуми моро ба ҳам наздик мекунад, барои Тоҷикистон кадр омода менамояд. Ин шахсоне, ки дар Русия маълумот мегиранд, минбаъд кӯшиш мекунанд, ки ба муддати тӯлонӣ ҳамкориҳои моро таҳким бахшанд. Соли хонши 2022-2023 шумори квотаҳо 100 адад зиёд шуда, ба 750 адад расид ва соли оянда боз афзуда мешавад”, – гуфт Путин.
Тавре ки хадамоти матбуоти сарвари давлати Тоҷикистон хабар медиҳад, шумори квотаҳо то 1 ҳазор ҷой зиёд карда мешавад.
Президенти Тоҷикистон Эмомалӣ Раҳмон зимни суханронӣ дар ин маросим зикр кард, ки дар шаҳри Душанбе таҳти сарпарастии ду кишвар Донишгоҳи славянии Русияву Тоҷикистон, филиалҳои донишгоҳҳои бонуфузи Русия, аз қабили Донишгоҳи давлатии Москва, Донишкадаи энергетикии Москва ва Филиали Донишгоҳи миллии тадқиқотӣ-технологии «МИСиС» бомуваффақият фаъолият доранд.
“Дар маҷмӯъ, бо дарназардошти донишҷӯёни Донишгоҳи Славянии Русияву Тоҷикистон ва филиалҳои зикршудаи донишгоҳҳои Русия, шумораи ҷавонони тоҷик, ки бо таҳсил бо забони русӣ фаро гирифта шудаанд, беш аз сӣ ҳазор нафарро ташкил медиҳад. Имрӯз дар беш аз 700 донишгоҳи Русия ҳудуди 25 ҳазор шаҳрванди Тоҷикистон таҳсил менамояд. Хатмкунандагони донишгоҳҳои Русия ҷавобгӯи ниёзмандиҳои соҳаҳои гуногуни иқтисоди миллӣ буда, аз ҳисоби онҳо иқтидори кадрии бахшҳои хизмати давлатӣ, дипломатия, илму педагогика ва фарҳангу санъати тоҷик пайваста пурра мегардад”, – гуфт Эмомалӣ Раҳмон.
Ёдрас мекунем, ки Русия аз ҳама бештар ба донишҷӯён аз Тоҷикистон барои таҳсили бепул дар макотиби олии Русия ҷойҳои буҷетӣ ҷудо мекунад.
750 квота дар соли хониши 2022/2023 (соли пешин – 630 ҷой) яке аз бисёртарин квотаҳо дар ҷаҳон аст.
Моҳи январ роҳбари намояндагии Россотрудничество дар Тоҷикистон Иван Иванов зикр карда буд, ки довталабон аз Тоҷикистон мехоҳанд бештар дар кластери тиббӣ таҳсил кунанд. Дар ин ҷо озмун ба ординатура 28 нафар барои 1 ҷой аст. Барои дохил шудан ба дигар ихтисосҳо низ хоҳишмандон зиёданд.
Довталабони тоҷик ба сифати ҷойи таҳсил натанҳо шаҳрҳои Маскаву Санкт-Петербург ва Қазон, балки макотиби дигари олии Русияро аз Калининград то Якутск ва Шарқи Дур интихоб мекунанд. Ҳар яке мақсадҳои худро дорад, аз робитаҳои хешутаборӣ то касби мушаххас дар ин ё он мактаби олии минтақа.
