Музаффар Ашӯриён, вазири адлияи Тоҷикистон, бо судури як фармон полковник Мирзо Маҳмадиро сардори идораи зиндонҳои вилояти Суғд таъйин намуд. Иттилои мазкурро ба “Asia-Plus” Сироҷиддин Нуров, сардори шӯъбаи кадри Вазорати адлияи Тоҷикистон таъйид намуд.
Тибки иттилои дастрасгардида, полковник Мирзо Маҳмадӣ дар ин мақом полковник Иброҳим Солеҳзодаро иваз намуд. Иброҳим Солеҳзода то барканориаш дар вазифаи сардори идораи зиндонҳои вилояти Суғд ҳудуди 10 сол кор кардааст.
Мирзо Маҳмадӣ бошад, то имрӯз дар Қӯшунҳои сарҳадии КДАМ кор мекард.
Гуфта мешавад, ки сардори нави зиндонҳои вилояти Суғдро генерал Мансурҷон Умаров, сардори Сарраёсати иҷрои ҷазои ҷиноятии Вазорати адлия муаррифӣ намудааст.
Тағйироти кадрӣ дар сохтори зиндонҳои кишвар замоне сурат мегирад, ки чанде пештар расонаҳо дар бораи фирори як маҳбус аз боздоштгоҳи №1-и шаҳри Душанбе иттилоъ дода буданд. То ҳол тақдири ин маҳбус номаълум аст.
