Вазорати маориф ва илм хонандагону донишҷӯён ва ҳамаи омӯзгоронро уҳдадор кардааст, ки то 1 январи соли 2023 400 калимаи русӣ ва англисӣ аз худ кунанд.
Аз вазорати маориф ва илм бо тасдиқи ин хабар гуфтанд, ки фармоиши вазир дар ин бора таҳти №1337, аз 13 –уми сентябр, ба имзо расидааст.
“Дар асоси фармоиши вазир ҳамаи омӯзгорони мактабҳо, хонандагони санфҳои 5-11, донишҷӯён ва дигар кормандони соҳаи маорифи кишвар муваззафанд, ки то оғози соли нав 400 калимаи русӣ ва англисиро азёд кунанд”, – гуфтанд аз вазорати маориф ва илм.
Ҳадафи фармоиши мазкур омӯзиши ҳарчӣ бештари забонҳои хориҷӣ аз ҷониби хонандагон, донишҷӯён ва омӯзгорони кишвар, татбиқи “Барномаи давлатии такмили таълим ва омӯзиши забонҳои русӣ ва англисӣ дар Ҷумҳурии Тоҷикистон барои давраи то соли 2030” ва иҷрои дастуру супоришҳои Президенти Тоҷикистон дар самти омӯзиш ва донистану такмили забонҳои русию англисӣ зикр мегардад.
Гуфта мешавад, ки ба ин мақсад, вазорат дастури роҳнамои “Луғати вожаҳои серистеъмоли забонҳои тоҷикӣ, русӣ ва англисӣ”-ро омода ва барои омӯзиш пешниҳод кардааст.
ИЗОБРАЖЕНИЕ
“Луғати мазкур 400 вожаи серистеъмолеро дар бар гирифтааст, ки онҳо дар зиндагии рӯзмарра бо забони модарӣ пайваста мавриди истифода қарор мегиранд ва маънои онҳо маълуму фаҳмо аст. Ҳамзамон, донистани ин калимаҳо маҳорату малакаи забономӯзиро ташаккул дода, зимни азёд кардани вожаҳо, шавқу рағбат барои донистани забонҳои русию англисӣ боз ҳам афзунтар мегардад”, – омадааст дар сарсухани луғати мазкур.
Ин ниҳод аз ҳамаи роҳбарони макотиби миёна ва олӣ, омӯзгорон талаб кардааст, ки “зимни азёд кардани луғатҳо хонандагону донишҷӯёнро раҳнамоӣ ва назорат кунанд”.
Маълум нест, ки аз худ кардани луғатҳоро кӣ назорат ва барои иҷро накардани дастур чӣ чора андешида мешавад.
Аз вазорати маориф ҳам ба ин суоли “Азия-Плюс” посух надоданд.
