Раҳим Саидзода, вазири маориф ва илми кишвар зимни як “рейд”-и ногаҳонӣ дар мактаби №41-и ноҳияи Файзобод норасоии компютерҳо, то ҳол истифодаи шудани компютерҳои насли куҳнаи “Pentium-1” ва “Pentium-2”, баргузор нашудани дарсҳои амалии фанни технологияи иттилоотӣ дар пайи “лимит”-и барқ ва норасоии китобҳои дарсиро ошкор кардааст.
Маркази матбуоти ин ниҳод хабар медиҳад, ки дирӯз, 27-уми октябр, вазири маориф бидуни огоҳӣ ба мактаби мазкур рафт ва аз ҳолати кунунии он дидан намуд. Вазир аз давомоти хонандагон, ҳолати рӯзномадорӣ, қайди журналҳои синфӣ, омодагии омӯзгорону хонандагон ба дарс, дастрасии луғати вожаҳои серистеъмоли забонҳои тоҷикӣ, русӣ ва англисӣ, тозагии синфхона ва гирду атрофи мактаб қаноатманд гардида, ҳамчунин, чанд камбудиро ошкор кардааст.
ИЗОБРАЖЕНИЕ
Норасоии компютерҳо ва то ҳол истифода шудани компютерҳои насли куҳнаи Pentium-1 ва Pentium-2, бо сабаби набудани қувваи барқ баргузор нашудани дарсҳои амалии фанни технологияи иттилоотӣ ва кифоя набудани рушноӣ дар синфхонаҳои таълимӣ, аз ҷониби омӯзгори ғайриихтисос дарс гуфтани фанни технологияи иттилоотӣ аз ҷумлаи камбудиҳое будааст, ки вазири маориф ва илм ислоҳи ҳарчи зуди онро талаб кардааст.
Ҳамчунин, вазири маориф аз норасоии баъзе аз китобҳои дарсӣ нигаронӣ карда, ҷиҳати ислоҳи он ба роҳбарияти муассиса, мудири шуъбаи маориф ва намояндаи ҳукумати ноҳия дастуру супоришҳо додааст.
ИЗОБРАЖЕНИЕ
Раҳим Саидзода аз хонандагон даъват карда, ки ҷиҳати омӯзиши забони давлатӣ ва забонҳои русию англисӣ, иштирок дар озмунҳои ҷумҳуриявӣ – “Фурӯғи субҳи доноӣ китоб аст” ва “Илм – фурӯғи маърифат”, омодагии ҳамаҷониба барои дохил шудан ба муассисаҳои таҳсилоти миёна ва олии касбӣ, пос доштани арзишҳои миллӣ ва муҳимтар аз ҳама, ба ҷо овардани эҳтироми омӯзгор таваҷҷуҳи бештар зоҳир намоянд.
Ӯ ҳамчунин, ба муаллимон суҳбат карда, гуфтааст, дар баланд бардоштани сифати таълиму тарбия ва омода намудани мутахассисони хуби забондон бештар саҳмгузор бошанд.
Ёдовар мешавем, ки чанд пеш низ вазири маориф ва илм ба як кӯдакистон ва мактаби ноҳияи Фирдавсӣ дидан карда, камбудиҳои ҷиддиро ошкор ва барои ислоҳи он вақт дод. Вале бо гузашти чанд рӯз, муовини вазири маориф ва илм аз ин кӯдакистон дидан кард ва маълум шуд, ки камбудиҳо бартараф нашуданд. Дар натиҷа, мудири кӯдкистон аз вазифа озод ва директори мактаб ба кори дигар таъйин шуд.
