Журналистикаи интернетӣ дар Тоҷикистон таҳқиқ гардида, вижагиҳо ва мушкилоти ташаккули қолабҳои нав дар фазои расонаӣ мавриди баррасӣ қарор гирифтааст.
Илҳомҷон Ҳамидиён ва Фирдавси Низом, номзадҳои илми филология ва рӯзноманигорони тоҷик натиҷаи таҳқиқоти мазкурро дар китоби “Журналистикаи интернетӣ дар Тоҷикистон: ташаккул, мушкилот ва дурнамо” ахиран ба чоп расонидаанд.
Муаллифон кӯшиш намудаанд, ки ташаккул, мушкилот ва ояндаи журналистикаи интернетиро дар кишвар баҳо диҳанд ва ҷойгоҳи онро дар раванди навини журналистикаи онлайнӣ бозгӯӣ карда бошанд.
Ба гуфтаи муҳаққиқон, журналистикаи интернетӣ дар чандсолаи ахир дар кишвар рушд кардааст, чандрасонаӣ ба миён омада ва рӯзноманигорони шаҳрвандӣ беш аз пеш фаъол гардидаанд.
Як қисми махсуси ин китобро амнияти иттилоотӣ, таблиғот, мухобирот ва рекламаи сиёсӣ, сомонаҳои расмӣ ва таъмини иттилоот ташкил додааст.
Китоби мазкур ҳамчун манбаи мукаммали иттилоотию таҳлилӣ ба доираи васеи журналистиву ҷомеаи шаҳрвандӣ тавсия мешавад.
