Муҳаммадмаҳдии Исмоилӣ, вазири фарҳангу иршоди исломии Эрон дар маҳфили адабии шоирони Эрону Тоҷикистон дар Душанбе гуфт, аҳли фарҳангу адаб набояд иҷоза диҳанд, то байнашон фосила эҷод шавад.
Шоми дирӯз, 1-уми октябр, зимни баромади худ дар толори Иттифоқи нависандагони Тоҷикистон вазири Эрон гуфт, “ҳамбастагии кишварҳои Эрону Тоҷикистон ба мисли як ҷон дар ду тан аст ва забони мо гувоҳи исботи ин гуфтаҳост”.
“Фарҳанги форсӣ густурдатар аз маҳдудаи ҷуғрофиёӣ аст ва забони форсӣ моро ба ҳамдигар мепайвандад. Пас, шоирон созандаи ҳувияти муштарак дар Эрону Тоҷикистону Афғонистон ҳастанд”, – афзуд Исмоилӣ.
Муҳаммадмаҳдии Исмоилӣ таъкид дошт, ки “аҳли фарҳанги се кишвари ҳамзабон набояд аз ҳам фосила дошта бошанд ва шаҳодатномаи хатчанопазири таърихиро ҳифз намоянд”.
Дар ҳамин баробар, вазири фарҳангу иршоди Эрон барои тақвияти гуфтаҳояш хабар дод, ки ҳамакнун китоби ашъори 30 шоири муосири тоҷик дар Эрон нашр мешаванд ва дар китобхонаи бузурги “Боби китоб”-и ин кишвар барои мутолиа пешкаш мегарданд.
“Ҳоло мо бо ибтикори устод Алиризо Қазва ҳашт китоби шоирони шинохтаи тоҷик, ба монанди Низом Қосим, Рустами Ваҳҳоб, Аскар Ҳаким, Озарахш, Фарзона, Давлати Раҳмониён, Рустами Аҷамӣ, Шоҳмирзо Шоҳмансурро бо хатти форсӣ омода кардем ва ба нашр расонидаем”, – афзуд ӯ.
Ёдовар мешавем, ки пас аз баргузории Рӯзҳои фарҳангии Тоҷикистон дар Эрон, ҳафтаи равон дар чор шаҳри бузурги кишвар “Рӯзҳои фарҳангии Ҷумҳурии Исломии Эрон дар Тоҷикистон” баргузор мегардад.
