Ҳар ҳафта дар барномаи “Фурсати донистан”-и радиои “Азия-Плюс” мо бо ҳуқуқшиносон дар мавриди масоили расмиёти маъмурӣ мусоҳибаи ихтисосӣ анҷом медиҳем. Ин бор меҳмони барнома ҳуқуқшиноси маъруф ва вакили дифоъ Иноят Иноятов буд, ки бо Манижа Ахмедова мавзуи мӯҳлатҳо дар расмиёти маъмуриро баррасӣ карданд.
Мӯҳлат дар расмиёти маъмурӣ ва тартиби барқарор намудани мӯҳлати гузаронидашуда чӣ гуна танзим гардидааст?
Масъалаи мӯҳлатҳои дар расмиёти маъмурӣ дар моддаи 44-и Кодекси расмиёти маъмурӣ ба танзим дароварда шудааст. Пеш аз ҳама, бояд ёдовар шавем, ки ҳангоми ҳисоби мӯҳлат дар расмиёти маъмури тартиби муқаррарнамудаи моддаҳои 109-114-и Кодекси мурофиавии граждании Ҷумҳурии Тоҷикистон татбиқ мегардад.
Зимнан, қайд менамоем, ки агар тарафи манфиатдор ӯҳдадор бошад, ки мӯҳлати муқарраргардидаро риоя кунад, мӯҳлати зикршуда танҳо аз рeзи ба тарафи манфиатдор додани ҳуҷҷатҳои дахлдор ё иттилоот, ё ки нашри расмии ин иттилоот оғоз мегардад.
Мувофиқи талаботи қонун мӯҳлати гузарондашуда бояд барқарор карда шавад, агар тарафи манфиатдор мӯҳлати муқаррарнамудаи қонун ё мақомоти маъмуриро бо сабабҳои узрнок гузаронда бошад.
Тарафи манфиатдор дар мавриди барқарор намудани мӯҳлати гузарондашуда бо аризаи хатти ба мақомоти маъмури муроҷиат менамояд. Ба ариза бояд ҳуҷҷатҳо ва маводи дахлдоре, ки вуҷуд доштани сабабҳои узрноки гузарондани мӯҳлатро тасдиқ мекунанд, замима карда шаванд. Масалан ҳуҷҷатҳои хаттӣ оиди беморӣ, оиди дар сафари хизматӣ будан ва дигар ҳуҷҷатҳои боэътимод.
Мақомоти маъмурӣ аризаро дар бораи барқарор намудани мӯҳлати гузарондашуда дар давоми 5 рӯз баррасӣ мекунад ва дар асоси натиҷаҳои он дар бораи қонеъ гардонидан ё рад намудани қонеъгардонии ариза санади маъмурӣ қабул мекунад.
Мӯҳлати қабули санади маъмурӣ дар қонун муқаррар шудааст ё не?
Мӯҳлати қабули қарор ё санади маъмурӣ дар моддаи 50 Кодекси расмиёти маъмурӣ пешбинӣ шудааст.
Санади маъмурие, ки ба манфиати шахсони сеюм дахл намекунад, бояд дар давоми 15 рӯзи баъди пешниҳоди аризаи маъмурӣ қабул карда шавад, агар қонунгузории Ҷумҳурии Тоҷикистон тартиби дигареро муқаррар накарда бошад. Мақомоти маъмурӣ дар мӯҳлати як моҳ баъди пешниҳоди аризаи маъмурӣ санади маъмуриро қабул менамояд, агар қонунгузории Ҷумҳурии Тоҷикистон тартиби дигареро муқаррар накарда бошад.
Мақомоти маъмурӣ дар мӯҳлати ду моҳ баъди пешниҳоди ариза санади меъёрии ҳуқуқии маъмуриро қабул менамояд, агар қонунгузории Ҷумҳурии Тоҷикистон тартиби дигареро муқаррар накарда бошад. Мӯҳлати умумии қабули санади маъмурӣ набояд аз 3 моҳ зиёд бошад.
Зимнан ёдрас менамоем, ки агар ҷиҳати муайян намудани ҳолатҳои барои парванда дорои аҳамияти ҷиддӣ мӯҳлате зарур бошад, ки аз мӯҳлати барои қабули санади маъмурӣ пешбининамудаи қонун зиёд аст, мақомоти маъмурӣ дар бораи муайян намудани мӯҳлати қабули санади маъмурӣ қарор қабул мекунад.
Ин матлаб дар ҳамкорӣ бо Ҷамъиятӣ олмонии ҳамкориҳои байналмилалӣ дар доираи лоиҳаи "Шаҳрванд дар расмиёти маъмурӣ ва истеҳсолоти иҷро" омода шудааст.
