Содироти дубора ё худ такрорӣ (реэкспорт)-и автомобилҳо аз Гурҷистон ба Тоҷикистон давоми моҳҳои январ-сентябри соли 2022 дар муқоиса бо ҳамин давраи соли гузашта (5,4 млн доллар) ба андозаи 61,1% – то 8,7 млн доллар зиёд шуд. Дар ин бора “Вестник Кавказа” бо истинод ба Раёсати миллии омори Гурҷистон хабар медиҳад.
Ба иттилои Раёёсат, дар ин давра аз Гурҷистон ба Тоҷикистон 1 ҳазору 470 автомобил интиқол дода шудааст, ки қариб ду баробар бештар аз нишондиҳандаи моҳҳои январ-сентябри соли гузашта (760 автомобил) мебошад.
Байни дигар кишварҳое, ки ба онҳо аз Гурҷистон воситаҳои нақлиёт дубора содирот мешаванд, Озарбойҷон, Украина, Молдова, Арманистон, Белгия ва ҳамаи кишварҳои Осиёи Марказӣ номбар шудаанд.
Дар байни кишварҳои минтақаи Осиёи Марказӣ аз лиҳози содироти дубораи автомобилҳо аз Гурҷистон Қазоқистон пешсаф аст, ки хариди ин гуна автомашинаҳоро ба миқдори 215% зиёд кардааст.
Автомобилҳо аз ИМА, Аврупо ва Ҷопон ба бозори мошинҳои шаҳри Руставии Гурҷистон ҷамъ оварда шуда, аз ин ҷо ба бозорҳои минтақа бурда мешаванд.
“Нишондиҳандаи содироти дубора ба кишварҳои Осиёи Миёна хеле хубанд. Қазоқистон пешсаф аст. Агар бо соли пешин муқоиса кунем, нишондиҳандаи содироти такрорӣ панҷ баробар афзуд. Агар пештар ба Осиёи Миёна ба сурати умум дар як моҳ 200 автомашина интиқол медодем, пас ҳозир ин нишондиҳанда ҳудуди 1500 автомобилро ташкил медиҳад”, – хабар медиҳад 24.kz бо истинод ба гуфтаҳои директори маркетинг ва рекламаи бозори мошинҳо Стелла Камандарова.
Тавре ки Eurasianet менависад, ҳар сол даҳҳо ҳазор автомашинаҳои амрикоии аз эътибор соқитшуда, ба ин ё он гуна осебдида ба Гурҷистон фиристода мешаванд. Дар ин ҷо устои мошинҳо онҳоро таъмиру дубора васлу насб мекунанд, электроникаи онҳоро аз нав мегузоранд ва ранг мекунанд. Инчунин нишондиҳандаи таҷҳизоти сабти масофаи тайкардаи мошин ё худ одометрро кам карда метавонанд.
"Амрикоиҳо ба осонӣ аз мошинҳои худ даст мекашанд,- мегӯяд Реваз Николаишвили, як фурӯшандаи мошин дар Тифлис, ки бештар мошинҳои ҳарҷогарди “Тойота” ва “Субару” мефурӯшад. – Мо мошинҳои аз эътибор соқитшударо таъмир ва умри онҳоро чанд даҳсола дароз мекунем”.
