Бино ба маълумоти Агентии обуҳавошиносии Тоҷикистон, то 9 декабр дар қаламрави кишвар обуҳавои хунук пешбинӣ мегардад. Дар водиҳо борон борида ба барфи тар мубаддал мешавад, дар доманакӯҳ ва кӯҳҳо баъзан бошиддат барф меборад.
Дар водиҳо ва ноҳияҳои доманакӯҳи ҷумҳурӣ рӯзона ҳарорат ба ҳисоби миёна то 5 дараҷа гарм мешавад.
Дар робита ба ин пешгӯӣ, Кумитаи ҳолатҳои фавқулода ва мудофиаи граждании ҷумҳурӣ аз шаҳрвандон даъват мекунад, ки ҳангоми истифодаи дастгоҳҳои барқии гармкунӣ қоидаҳои бехатарии сӯхторро қатъиян риоя намуда, қувваи барқро сарфа кунанд.
Бо мақсади таъмини бехатарии ҳаракат дар роҳҳо, бахусус дар роҳҳои кӯҳӣ ва ағбаҳо ба ронандагон чунин твасияҳо дода мешавад:
– пеш аз сафар мошини худро тафтиш кунед, ки нуқсе надошта бошад;
– батареяи аккумуляторро иваз кунед;
– чархҳои тобистониро бо зимистона табдил кунед, мошинҳои калонҳаҷми боркашро бо ҳама гуна васоили эҳтиётӣ, аз ҷумла занҷирҳои зидди яхбандӣ, белҳо, шамолкашҳо, фонусҳо, панҷара барои радиатор таъмин намоед. Ҳамзамон бо ин, коршоямии системаи гармидиҳандаро санҷед;
– дар бордони мошинатон сарулибоси гарм, фонус, бели хурд, трос, бушкаи эҳтиётии пур аз сӯзишворӣ, гӯгирд, термоси пур аз об ё чойи гарм гузоред;
– дорухонаи мошинатонро нав кунед;
– бо суръате мошин ронед, ки бехатариро дар ҷойҳои сермошину серодам, назди мактабҳо, хамгаштҳо, пулҳо ва нишебиҳо таъмин созад;
– ҳангоми ҳаракат дар роҳҳои кӯҳӣ фосилаи байни мошинҳоро назар ба ҳолатҳои маъмулӣ дарозтар гузоред, зеро дар роҳҳои пурлой ва яхӣ нигоҳ доштани мошин мушкил аст;
– ҳаракат бо мошинро дар шабонгаҳон ва дар ҳоли тирагии ҳаво маҳдуд созед.
Ғайр аз ин, дар Кумита зикр мекунанд, ки агар автомашина ба зимистон омода набошад, беҳтараш аз сафарҳо худдорӣ кардан лозим аст.
Ҳамчунин КҲФ ба шаҳрвандон тавсия медиҳад, ки бомҳоро аз барф тоза карда, автомашинаҳоро зери дарахтҳо нагузоранд.
Барои пешгирӣ аз паҳншавии бемориҳои мавсимӣ, Кумита тавсия медиҳад, ки дар нақлиёти ҷамъиятӣ ва макони серодам шаҳрвандон бояд ниқоб пӯшанд.
Аз шаҳрвандон боисрор дархост мешавад, ки дар ин рӯзҳо бидуни зарурат ҳаракат дар роҳҳоро маҳдуд созанд, аз корҳои кишоварзӣ, чаронидани чорво, моҳидорӣ, ҷамъоварии ҳезум ва шикор дар мавзеъҳои кӯҳӣ худдорӣ карда, мувофиқи мавсим либос пӯшанд ва барои пешгирӣ аъ заҳролудшавӣ аз дуд қубурҳои оташдонро бори дигар аз назар гузаронанд.
