Додгоҳи вилояти Суғд Мутриба Розиқова, сокини ноҳияи Бобоҷон Ғафуровро барои куштори фарзанди хурсолаш 18 сол равонаи зиндон намудааст.
Дар ҳукми Суди вилояти Суғд гуфта мешавад, ки Мутриба Розиқова бо нафаре, ки дар хонааш ба таъмир машғул будааст, шинос шуда, бо ӯ робита барқарор мекунад. Ин зан 26 майи соли 2021 писарча таваллуд мекунад ва пайвандони шавҳараш даъво пеш меоранд, ки фарзанди таваллудшуда ба шавҳари Мутриба Розиқова монанд нест. Аз ин лиҳоз, онҳо талаб мекунанд, ки кӯдаки навзод аз ташхиси биологӣ-молекуляторӣ (ДНК) гузаронида шуда, падарии ӯ дақиқ карда шавад.
“Мутриба Розиқова барои ошкор нашудани амалҳои шармандасози худ нақшаи аз ҳаёт маҳрум кардани навзодашро мекашад. 22 апрели соли 2022 вақте хонаро холӣ ва барои амалӣ кардани мақсадаш муносид мебинад, кӯдаки 11-моҳаро дар гавҳора бӯғӣ карда, ба ҳалокат мерасонад” – омадааст дар ҳукми додгоҳ.
Пас аз қатли кӯдак, Мутриба Розиқова сабаби маргро ба пайвандони шавҳараш беморӣ мегӯяд, аммо пайвандони шавҳараш ба ин бовар накарда, талаби ташхиси тиббӣ мекунанд. Дар натиҷа, пас аз дафн, қабр бозкушоӣ ва ҷасади кӯдак ташхис карда мешавад.
“Хулосаи экспиртизаи тиббӣ-судӣ муайян мекунад, ки хурдсол аз беморӣ не, балки дар натиҷаи асфиксияи механикӣ, яъне баста шудани сурохиҳои роҳи нафас ба ҳалокат расидааст”, – гуфта мешавад дар ҳукми додгоҳ.
Дар робита ба ин ҳодиса, Мутриба Розиқова боздошт ва барои куштори шахси ноболиғ ё нафари дар ҳолати оҷизӣ қарордошта айбдор дониста шуда, бо дастрасӣ ба моддаи 104 қисми 2 банди “в”-и Кодекси ҷиноятии Тоҷикистон ба 18 соли колонияи ислоҳии дорои низомаш умумӣ маҳкум гардидааст.
