Дар Душанбе муддати қариб ду рӯзи пурра барф борида, шаҳр ҷомаи сафед ба бар кард.
Имрӯз ҳам кӯчаҳо пурбарф буда, заминро қабати ғафси барф пӯшонидааст. Аз ин вазъи табиат кӯдакон хурсанд шуда, барфбозиву яхмолакбозӣ мекунанд.
Дар ҳамин ҳол, боридани ин қадар барфи зиёд ба ҳаракати пиёдагардону воситаҳои нақлиёт мушкил эҷод кард.
Тавре ки ба “Азия-Плюс” аз Агентии обуҳавошиносии ҷумҳурӣ хабар доданд, барф на он қадр зиёд боқӣ мемонад, лекин бар асари ҳавои сард дар рӯзҳои наздик об намешавад. Аз ин рӯ, сокинони пойтахт боз чанд рӯзи дигар метавонанд аз зимистони ҳақиқӣ баҳра баранд.
Зикр шуд, ки давоми ин рӯзҳо дар минтақаҳои гуногуни кишвар то 24 см боришот ба қайд гирифта шудааст. Дар Душанбе ин нишондиҳанда 12 см-ро ташкил додааст.
Бино ба маълумоти Агентии обуҳавошиносии ҷумҳурӣ, рӯзҳои 12-15 январи соли ҷорӣ бо сабаби боқӣ мондани воридшавии анбӯҳи ҳавои сарди арктикӣ дар бештари манотиқи кишвар сардии ҳаво боқӣ мемонад.
Дар бештари ноҳияҳои водӣ-доманакӯҳии ҷумҳурӣ ҳарорати ҳаво шабона аз 19-24 то 13-18 дараҷа хунук, рӯзона аз 9-14 то 3-8 дараҷа хунук, дар ноҳияҳои кӯҳӣ шабона аз 20-25 то 14-19 дараҷа хунук, рӯзона аз 12-17 то 5-10 дараҷа хунук дар назар аст.
Гуфта мешавад, рӯзҳои 12-14 январ дар қисми зиёди ноҳияҳои водӣ-доманакӯҳӣ ва ағбаҳо фаромадани тормеғ дар назар буда, яхбандӣ (дар шоҳроҳҳои ҷумҳурӣ, дарахту буттаҳо, шифти хонаҳо дар шакли овеза) пешгӯӣ мешавад.
Бо сабаби сард гардидани вазъи ҳаво дар чарогоҳҳои зимистона ва минтақаҳои чорвопарварии ҷумҳурӣ сармозании чорвои навзод дар назар буда, нигоҳдории чорвои навзод дар ҷойҳои махсус тавсия дода мешавад.
Рӯзҳои 12-14 январ дар нишебиҳои ҷанубӣ ва шимолии қаторкӯҳҳои Ҳисор, минтақаҳои кӯҳии Ноҳияҳои тобеъи ҷумҳурӣ ва дар баъзе ноҳияҳои ғарбии ВМКБ сар задани зуҳуроти тарма дар назар аст.
