Боришоти барф ва сардии ҳаво, ки аз 10-уми январ дар саросари кишвар ҳукмфармост, сокинонро ба мушкилоти зиёд гирифтор кардааст. Дар аксари манотиқи кишвар аз мушкили қатъи барқ, дараҷаи пасти низоми гармидиҳӣ ва якбандии қубарҳои обгузар шикоятҳо ба якборагӣ афзуд. Нафарони зиёд дар шабакаҳои иҷтимоӣ аз омода набудани мақомоти дахлдор ба сардии ҳаво интиқод менамоянд.
Дар шаҳри Хуҷанд даҳҳо нафар аз яхбандии қубурҳои обгузар ва корношоям гардидани низоми корези маҳаллаҳои алоҳида шикоят мекунанд.
Аз ҷумла, Мадина Почоева, сокини маҳаллаи Сирдарёи шаҳри Хуҷанд мегӯяд давоми се рӯзи сардии ҳаво аз набудани оби нӯшокӣ ранҷ бурдаанд ва пас аз муроҷиати пайиҳам масъулин ба мушкили ӯ расидагӣ кардаанд.
“Мо дар маҳаллаи Сирдарё, бино № 39 зиндагӣ мекунем. Се рӯз аз яхбандии об мушкилӣ кашидем. Танҳо баъди зангҳои зиёд ва дархостҳои пайиҳам маъулини “Хуҷандобуканал” омада, муаммои моро ҳал карданд”, – мегӯяд ӯ.
Ин сокини Хуҷанд мегӯяд, дар биноҳои бисёрошёна бе оби нӯшокӣ зистан бисёр душвор аст ва онҳо давоми се рӯзи беобӣ аз бинои ҳамсоя дастӣ об кашонидаанд.
Мисли Мадина даҳҳо нафаре ҳастанд, ки дар ин сардиҳо аз мушкили обу корези шаҳр шикоят мекунанд.
Масъулини шаҳри Хуҷанд мушкили обу корезро тасдиқ карда, иброз медоранд, ки барои ҳалли саривақтии он тамоми нерӯи дар ихтиёр доштаашонро сафарбар кардаанд.
Абдуҳалим Нӯъмонов, сармуҳандиси КВДК “Хуҷандобуканал” имрӯз, 16-уми январ, зимни суҳбат бо “Азия-плюс” гуфт, аз оғози сардии шадид 90 дархост барои бартарафкунии яхбандии об дар хонаҳои истиқоматӣ қабул кардаанд ва то имрӯз, 50 дархост ба таври мусбат қонеъ карда шуда, дар нуқтаҳои дигар корҳои бартарафкунӣ идома дорад.
“Барои қонеъ кардани муроҷиати сокинон ва бартараф намудани мушкилоти мавҷуда 30 нафар корманад бо техникаи дар ихтиёр дошта, сафарбар шудаанд ва шабонарӯз пайи раъфи камбудҳо ҳастанд”, – гуфт Абдуҳалим Нӯъмонов.
Ба иттилои ин масъули КВДК “Хуҷандобуканал” давоми 5-6 рӯзи сардии шадид дар ҳудуди шаҳри Хуҷанд 3 садамаҳои хатти оби нушокӣ ба қайд гирифта шудааст.
Сухангӯи раиси шаҳри Хуҷанд Маъмур Юсуфзода низ мавҷудияти мушкилро тасдиқ кард ва зикр намуд, ки воқеан сардии ҳаво сабаби ях бастани обҳо гардид ва ин барои кормандон ва масъулини КВДК “Хуҷандобуканал” мушкил пеш овард.
“Новобаста ба сардии ҳаво, масъулини шаҳр шабонарӯзӣ дар пайи бартарафсозии мушкилот ҳастанд ва аз тамоми имконияти мавҷуда истифода мебаранд”, – гуфт Маъмур Юсуфзода.
Ёдовар мешавем, ки рӯзи 10-уми январ дар аксар минтақаҳои Тоҷикистон барфи зиёд борид. Мутахассисони ҳавошиносии кишвар як ҳафта қабл огоҳ карда буданд, ки барфи зиёд меборад ва сардиҳои шадид дар пеш аст. Мақомот қаблан иддао карда буданд, ки барои зимистонгузаронӣ омодаанд, аммо сардиҳои ахир собит кард, ки дар асл мақомоти марбутаи кишвар дучори мушкилу камбуди зиёд гардида, барои таъмини гармиву оби нӯшокӣ дар сардӣ пурра омода набудаанд.
