Одилҷон Халилов, бесарпаноҳ ё “бомж”, ки чанде қабл “Азия-Плюс” оид ба тақдиру шароити зисти ӯ гузориш нашр намуда буд, аз ҷониби ҳамсинфонаш шиносоӣ ва соҳиби сарпаноҳ гардид. Дар ин бора Баҳрӣ Абдураҳмонова, мудири созмони “Диёр” иттилоъ дод.
Одилҷон Халилови 60-сола, яке аз бесарпаноҳон дар шаҳри Хуҷанд мебошад, ки давоми 5-сол аст дар кӯчаҳои шаҳр мегардад. Ӯ сокини шаҳри Исфара буда, барои рафтан ба хонаи пиронсолон ҳуҷҷатҳои лозима надорад.
Мудири созмони “Диёр”, ки дар Хуҷанд мустақар буда ба расонидани кӯмак ба нафарони бесарпаноҳ машғул аст, мегӯяд, “давоми 20-соли фаъолият бори аввал аст, ки баъди нашри мавод як бесарпаноҳро суроғ мекунанд”.
ИЗОБРАЖЕНИЕ
“Ҳамсинфони Одилҷон Халилов гузориши “Азия-Плюс”-ро дида, новобаста ба он ки 40 сол пеш мактабро хатм кардаанд, ӯро шинохтаанд. Онҳо суроғ карда омаданд ва иқдом намуданд, ки ҳамсинфи худро табобат карда, дар таҳияи ҳуҷҷатҳо барои ба хонаи пиронсолони шаҳри Хуҷанд ҷой кардан саҳм гузоранд”, – гуфт Баҳри Абдураҳмонова.
Пас аз таҳияи ҳуҷҷатҳои Одил Халилов, 31-уми январ ӯ ба Муассисаи давлатии “Маркази минтақавии хизматрасонии иҷтимоӣ ба пиронсолон ва маъюбон дар шаҳри Хуҷанд” бурда шуд.
“Барои марде, ки 5 сол бе сарпаноҳ буду дар кӯчаҳо мезист ва интизори дастгирӣ буд, ин як муҷиза аст”, – мегӯяд Баҳрӣ Абдураҳмонова.
ИЗОБРАЖЕНИЕ Баҳри Абдураҳмонова
Гуфтан ба мавриди аст, ки дар хусуси Одил Халилов “Азия-Плюс” 21-уми декабр таҳти унвони “Фавти беш аз 30 “бомж” дар Хуҷанд. Онҳо ба кӯмак ниёз доранд” матлаб омода карда буд.
Он замон Одил Халилов гуфта буд, ки шиносномаи худро дар Русия, ки чанд сол он ҷо буд, гум кардааст ва ҳамин тариқ, то ба ҳол барои гирифтани шиноснома кӯшиш накардааст.
Ӯ зикр карда буд, ки аслан дар шаҳри Исфара мезист ва бо духтари доғистоние оила бунёд карда, соҳиби дугоник шуд. Ҳар ду фарзанди ӯ дар Афғонистон хизмат карданд ва соли 1996 дар пайи хизмат ҳарду шаҳид шуданд.
Ба гуфтаи ӯ, вақте ҷасади фарзандонашро оварданд, ҳамсари доғистониаш Мадина Расулова баробари дидани ҷасадҳо дилкаф шуда, фавтид ва ҳамин тариқ, ӯ яккаву танҳо монд.
ИЗОБРАЖЕНИЕ
Вақте баъди солҳо Одилҷон Халилов ба зодгоҳаш баргашт, фарзандони падар аллакай хонаю дарашро аз худ карда, ӯро дигар ба хонаи падарӣ роҳ надоданд ва ҳамин тавр ӯ бесарпаноҳ ва овора гашт.
Ёдовар мешавем, ки тибқи маълумоти ироакардаи созмони "Диёр" то соли 2021 дар вилояти Суғд қариб 500 бесарпаноҳ зиндагӣ мекард. Аксари онҳо баъди бесарпаноҳ монда, дар кӯча зиндагӣ кардан, дар гаражу вайронаҳо вафот мекунанд.
