Пас аз як соли оғози ҷанг дар Украина ва фирори ҳазорон украиниҳову хориҷиён ҳамоно 1109 нафар сокинони вилояти Суғд дар ин кишвари ҷангзада кору зиндагӣ мекунанд. Дар ин бора Саид Камолзода, сардори раёсати Хадамоти муҳоҷирати Вазорати меҳнат, муҳоҷират ва шуғли аҳолӣ дар вилояти Суғд, имрӯз, 10-уми феврал, зимни нишасти матбуотӣ, иттилоъ дод.
Тибқи иттилои ӯ, аз теъдоди умумии сокинони вилояти Суғд, ки дар Украина қарор доранд, аксариятро сокинони шаҳри Конибодом ташкил медодаанд.
- шаҳри Конибодом 1066 нафар,
- ноҳияи Ашт 23 нафар,
- ноҳияи Айнӣ 7 нафар,
- шаҳри Панҷакент 8 нафар
- ноҳияи Зафаробод 5.
Саид Камолзода гуфт аксари муҳоҷирони тоҷики муқими Украина бо оилаи худ ба ин кишвар сафар карда, аллакай соҳиби ҷойи кор ва манзили зист шудаанд ва хоҳиши бозгашт ба зодгоҳи худро надоранд.
“Бо ин вуҷуд, барои таъмини амнияти онҳо мо талош карда истодаем, ки тавассути корҳои тарғиботӣ онҳоро ба Ватан баргардонем”, – гуфт Саид Камолзода .
Дар умум, ба қавли номбурда, аз вилояти Суғд 249 ҳазору 880 нафар: 191 ҳазору 432 нафар мард ва 58 ҳазору 448 нафар зан ба муҳоҷират рафтаанд.
Давлатҳое, ки сокинони вилояти Суғд ба муҳоҷират рафтаанд:
- Русия – 244 ҳазору 8 нафар,
- Қазоқистон – 1 ҳазору 842 нафар,
- Қирғизистон – 521 нафар,
- дигар давлатҳои ИДМ – 860 нафар,
- давлатҳои хориҷи дур – 1 ҳазору 540 нафар.
Фавти 300 сокини Суғд дар муҳоҷират
Бино ба иттилои Саид Камолзода соли 2022 ҷасади 289 нафар муҳоҷирони тоҷик аз вилояти Суғд ба Ватан оварда шудааст, ки аз ин 253 нафар мард ва 36 нафар зан мебошанд.
Сабабҳои фавти муҳоҷироти тоҷик:
- 211 нафар бо сабаби беморӣ,
- 45 нафар дар ҳодисаҳои нохуш,
- 15 нафар дар садамаи нақлиётӣ,
- 3 нафар ҳолати куштор,
- 3 нафар дар пайи заҳролудшавӣ,
- 4 нафар худкушӣ кардаанд,
- 2 нафар ғарқ шудаанд,
- 1 нафар дар сӯхтор,
- сабаби фавти 5 нафар номаълум будааст.
Бинобар иттилои ӯ, давоми соли 2022 аз Украина ҷасади ягон сокини вилояти Суғд оварда нашудааст.
