Сар аз имрӯз, 16-уми май, бинобар сабаби гузаронидани корҳои сохтмону азнавсозии роҳҳо дар хиёбони Бобоҷон Ғафурови пойтахт маҳдудият ҷорӣ мешавад. Дар ин бора шаҳрдории Душанбе иттилоъ медиҳад.
Ба гуфтаи манбаъ, ин маҳдудияти ҳаракати воситаҳои нақлиёт аз кӯчаи Шамсӣ то маркази савдои “Саодат” ҷорӣ шудааст.
“Ба маълумоти ронандагони воситаҳои нақлиёти автомобилгард, шаҳрвандон ва меҳмонон расонида мешавад, ки баҳри татбиқи Нақшаи генералии шаҳри Душанбе ҳаракати ҳама гуна воситаҳои нақлиёт дар ин кӯча муваққатан қатъ карда мешавад”, – менависад шаҳрдорӣ.
Бинобар гуфтаи шаҳрдории Душанбе, маҳдудияти ҳаракати воситаҳои нақлиёт дар кӯчаи мазкур як моҳ, то 15 июн, идома мекунад.
Аз ин лиҳоз, шаҳрдории Душанбе аз ронандагони воситаҳои нақлиёт эҳтиромона хоҳиш кардааст, ки талаботи аломатҳои роҳро риоя намуда, аз роҳҳои ҳамшафати хиёбони Бобоҷон Ғафуров истифода баранд.
