Давоми моҳҳои январ-марти соли ҷорӣ теъдоди шаҳрвандони хориҷие, ки бо мақсадҳои гуногун ба Тоҷикистон омаданд, 260 ҳазор нафарро ташкил дод. Ин нишондиҳанда 30,2% зиёдтар нисбат ба ҳамин давраи соли 2022 аст, хабар медиҳад Агентии омори назди президенти кишвар.
Беш аз 70%-и хориҷиён аз Ӯзбекистон (185,9 ҳазор нафар) ва зиёда аз 20%-ашон аз Русия (53,2 ҳазор нафар) ба Тоҷикистон омадаанд.
Вуруди хориҷиён ба Тоҷикистон аз Қазоқистон (6,7 ҳазор нафар), Чин (3,5 ҳазор), Туркия (2,3 ҳазор), Афғонистон ва Эрон (1,2 ҳазор нафарӣ) ба қайд гирифта шудааст. Миқдори нисбатан ками вуруди шаҳрвандони хориҷӣ (камтар аз 1 ҳазор) аз дигар кишварҳо низ сурат гирифтааст.
Дар ҳамин ҳол, теъдоди шаҳрвандони Тоҷикистон, ки дар семоҳаи аввали соли ҷорӣ аз ҷумҳурӣ хориҷ шудаанд, 812,1 ҳазор нафарро ташкил додааст, ки 38,4% зиёдтар нисбат ба ҳамин давраи соли 2022 мебошад.
Бино ба маълумоти Агентии омори назди президенти кишвар, дар семоҳаи аввали соли равон дар ҷумҳурӣ 240 ширкати сайёҳӣ фаъолият кардаанд.
Дар ҷумҳурӣ 185 меҳмонхона, аз ҷумла 6-то панҷситорадор, 20-то чорситорадор, 16-то сеситорадор, 3-то дуситорадор, инчунин 2 меҳмонхонаи дараҷаи аввал ва 136 меҳмонхона бедараҷа фаъолият доштанд.
Ҳамчунин дар кишвар 27 хостелу мотел (ҷойи хоб ва меҳмонхонаҳои хурд), 5 осоишгоҳ ва лагерҳо баро кӯдакон, 52 осоишгоҳ, 7 маркази фароғату солимгардонӣ, 6 хонаи истироҳат, 1 кемпинг ва 4 пойгоҳ (база)-и сайёҳӣ амал мекунанд. Қобили зикр аст, ки мутахассисон сайёҳиро дар баробари соҳаҳои саноати маъдани кӯҳӣ ва гидроэнергетика яке аз бахшҳое медонанд, ки дар оянда баҳри рушди иқтисоди Тоҷикистон мусоидати зиёд карда метавонад.
