Дар даври дуюми мусобиқоти Ҷоми Миллатҳои Ассотсиатсияи футболи Осиёи Марказӣ (CAFA Nations Cup-2023) дар гурӯҳи «А» мунтахаби футболи Тоҷикистон бо тими Уммон бозӣ кард.
Тавре ки Федератсияи футболи ҷумҳурӣ хабар медиҳад, вохӯрӣ мусовӣ – 1:1 анҷом ёфта, футболбозони тоҷик қариб пурра дар қисми дуюми бозӣ 10 нафар бозӣ карданд, зеро дар дақиаи 52-юм Табрез Исмоилов аз майдон хориҷ шуд.
Ҳисобро дар дақиқаи 14-уми бозӣ бо зарбаи 11-метра футболбози Уммон Саллаҳ Ал-Яҳёӣ боз намуда, як дақиқа пеш аз анҷоми қисми 1-ум Ваҳдат Ханнонов ҳисобро баробар кард. Ҳарчанд аз дақиқаи 52-юм футболбозони тоҷик 10 нафар бозӣ карда бошанд ҳам, ҳисоби мусовиро нигоҳ дошта тавонистанд.
Дар бозии дигари гурӯҳи “А” мунтахаби Ӯзбекистон тими Туркманистонро бо ҳисоби 2:0 шикаст дода, бо касби 6 имтиёз дар 2 бозӣ пеш аз муҳлат зинаи якумро дар гурӯҳ ишғол намуд ва ба даври финалии мусобиқоти «CAFA Nations Cup-2023» роҳхат гирифт.
Мунтахаби Тоҷикистон соҳиби 2 имтиёз ва дастаҳои Уммону Туркманистон 1-имтиёзӣ доранд. Мавқеи ниҳоии дастаҳо дар ҷадвали гурӯҳи “А” пас аз даври сеюми охирин маълум мешавад.
Мавқеи дастаҳо дар гурӯҳи "А" пас аз 2 давр:
ИЗОБРАЖЕНИЕ
Дар даври охирини марҳилаи гурӯҳии мусобиқоти «CAFA Nations Cup-2023» мунтахаби Тоҷикистон бо тими Ӯзбекистон ва Туркманистон бо Уммон бозӣ мекунанд. Вохӯрии футболбозони тоҷик бо мизбонони мусобиқа – тими Ӯзбекистон рӯзи шанбе, 17 июн дар варзишгоҳи “Бунёдкор”-и шаҳри Тошканд соати 20:30 оғоз мегардад.
