Аз 24 то 29 июн дар Тоҷикистон 2-3 дараҷа поинравии ҳарорат дар назар буда, дар ҳамин ҳол, дар баъзе ноҳияҳо чангу ғубор боқӣ мемонад.
Ёдрас мекунем, ки имрӯз, 24 июн дар Тоҷикистон рӯзи корӣ буда, аз якшанбе, 25 июн пайиҳам то 29 июн рӯзи истироҳат мешавад – ду рӯзи истироҳат ва ҷашни Рӯзи ваҳдати миллӣ ва Иди Қурбон.
Тавре ки ба “Азия-Плюс” аз Агентии обуҳавошиносии ҷумҳурӣ хабар доданд, ҳавои аз ҳама гармтар дар ин рӯзҳо дар вилояти Хатлон пешбинӣ мешавад, ҳарчанд дар муқоиса бо рӯзҳои гузашта, ҳарорат каме поин меравад.
Дар водиҳо ҳарорат то 38-43 дараҷа ва дар доманкӯҳҳо – ҳудуди 38 дараҷа гарм мешавад. Дар ноҳияҳои дар водӣ қарордоштаи вилоят фаромадани чангу ғубор дар назар аст.
Ҳарорат дар водиҳои вилояти Суғд шабона 17-22 ва рӯзона 31-36 дараҷа гарм, дар кӯҳҳо рӯзона то 25 дараҷа гарм мешавад.
Дар ғарби ВМКБ шабона ҳарорат 14-19 дараҷа, рӯзона 33-37 дараҷа, дар шарқи вилоят шабона то 7 даарҷа ва рӯзона 17-22 дараҷа гарм мешавад. Дар ғарби вилоят тӯфони чангу ғубор ва дар баъзе ноҳияҳо борони кӯтоҳмуддат аз эҳтимол дур нест.
Дар шаҳри Душанбе рӯзона ҳарорат дар сатҳи 39 дараҷа ва шабона 23-25 дараҷа гарм мешавад. Каме тӯфони чангу ғубор ба мушоҳида мерасад.
Дар Ноҳияҳои тобеи марказ ҳаво дар водиҳо то 39 дараҷа ва дар доманакӯҳҳо 30-35 дараҷа гарм мешавад. Ин ҷо ҳам чангу ғубор боқӣ мемонад.
Тӯфони чангу ғубор дар Душанбе аз куҷост?
Ба гуфтаи роҳбари Маркази омӯзиши тағйирёбии иқлим ва қишри озонии назди Агентии обуҳавошиносӣ Саттор Саидов, чангу ғубор дар шаҳр аз вазиши шамол аз дараи Варзоб меояд. Сохтмони босуръат низ ба вазъияти шаҳр таъсир мерасонад.
“Ҳангоми сохтмон дар шаҳрҳо одатан нармшавӣ ва ҳаракати хок ба амал меояд. Ин ба он оварда мерасонад, ки қабати ҳосилхези хок, ки дар таркибаш зарраҳои органикӣ ва маводи растанӣ мавҷуд аст, вайрон мешавад. Вақте ки ин гуна хок хушк мешавад, шамол метавонад чангро ба осонӣ бурда, тӯфони чангу ғуборро ба вуҷуд орад.
Ӯ ҳамчунин зикр кард, ки дар корҳои сохтмон маъмулан асбобу механизм ва техникаҳои гуногун, аз қабили булдозер, экскаватор ва мошинҳои боркаш истифода мешаванд.
"Ин мошинҳо метавонанд ба асфалт, бетон ва хок осеб расонанд, ки боиси ба ҳаво хестани миқдори зиёди ғубор мегардад, – шарҳ дод коршинос. – Майдонҳои сохтмон одатан аз дарахту, буттаҳо ва дигар растаниҳо, ки метавонанд чангро нигоҳ доранд, холианд. Аз ин рӯ, шамоли суст ҳам чанг мехезонад”.
Ба гуфтаи ӯ, ба сурати умум, афзоиши тӯфони чангу ғубор дар соли ҷорӣ дар Тоҷикистон ба боришоти начандон зиёд дар фасли баҳор низ марбут аст, ки ба ковоку мулоим шудани хок боис мегардад. Чунин вазъ дар кишварҳои ҳамсоя, аз ҷумла Афғонистон ва Ӯзбекистон низ ҷой дошта, чангу ғубор ба Тоҷикистон аз он ҷо низ мерасад.
