Дирӯз, 23-юми июл, ҷавони 22-солаи сокини пойтахт бо мошини тамғаи “БМВ” зани 54-солаи роҳрӯбро пахш намуда, ба ҳалокат расонидааст. Дар ин бора Раёсати Вазорати корҳои дохилӣ дар шаҳри Душанбе (РВКД) иттилоъ медиҳад.
Ба гуфтаи манбаъ, ҳодиса тақрибан соати 5:10 дақиқаи субҳи рӯзи 23-юми июл, дар роҳи мошингарди кӯчаи Соҳилӣ, аз самти кӯчаи А.Деҳотӣ ба самти кӯчаи С.Шерозӣ рух додааст.
“Ронанда як корманди корхонаи коммуналии ноҳияи Фирдавсиро пахш намуда, аз ҷойи ҳодиса фирор кардааст. Дар натиҷаи бардоштани ҷароҳатҳои гуногуни ҷисмонӣ ҷабрдида дар ҷойи ҳодиса ба ҳалокат расидааст”, – менависад РВКД.
Дар пайи чорабиниҳои оперативӣ – ҷустуҷӯӣ муайян гардидааст, ки садамаи мазкурро Умарҷон Раҷабови 22-сола, ронандаи автомашинаи тамғаи “БМВ”, рақамҳои қайди давлатиаш 19 67 RT 01, сокини шаҳри Душанбе содир намудааст.
Гуфта мешавад, номбурда баъд аз садамаи нақлиётӣ бо мақсади озод шудан аз ҷавобгарӣ воситаи нақлиёти худро ба кӯчаи Қаҳҳоров бурда пинҳон кардааст.
Айни замон вобаста ба ҳолати мазкур маводҳои зарурӣ тартиб дода шуда, ронанда Умарҷон Раҷабов дар ҳабси пешакӣ қарор дорад.
