Эмомалӣ Раҳмон, Президенти Тоҷикистон имрӯз, 24-уми июл, Шавкат Мирзиёев, Президенти Ӯзбекистонро бо ҷашни зодрӯзаш табрик карда, ба ӯ “сиҳатмандӣ, хушбахтӣ, некӯаҳволӣ ва комёбиҳои нави азим дар татбиқи нақшаҳои давлатиашон ба нафъи мардуми бародари Узбекистон” таманно кард.
Ба навиштаи Хадамоти матбуоти сарвари давлат, раиси ҷумҳури Тоҷикистон нақши назарраси Шавкат Мирзиёевро дар рушди бемайлони иқтисодиву иҷтимоии кишвари ҳамсоя ва тақвияти мавқеи он дар арсаи байналмилалӣ таъкид намуда, ба Ӯзбекистони дӯст пешрафту шукуфоӣ хост.
Дар идомаи суҳбат, менависад Хадамоти матбуоти роҳбари давлат, президентҳо ҷанбаҳои алоҳидаи шарикии стратегӣ ва ҳампаймонии Тоҷикистону Ӯзбекистонро баррасӣ намуданд. Дар ин зимн омодагии қатъии ҷонибҳо ҷиҳати таъмиқи муколамаи эътимодбахши байнидавлатӣ ва рушди минбаъдаи босамари муносиботи дӯстӣ ва ҳусни ҳамҷаворӣ мутобиқ ба манфиатҳои аслии мардумони ду кишвар мавриди таъкид қарор гирифт.
