Ҳолатҳои хариду фурӯши одамон дар Тоҷикистон дар нимсолаи аввали соли ҷорӣ 4,2% зиёд шуд, хабар медиҳад Агентии омор бо истинод ба мақомоти ҳифзи ҳуқуқи ҷумҳурӣ.
Гуфта мешавад, давоми моҳҳои январ-июни соли равон 34 ҳолати хариду фурӯши одамон ба қайд гирифта шудааст, дар ҳоле, ки дар ҳамин давраи соли гузашта ин рақам ҳамагӣ 4 ҳодисаро ташкил медод.
Ҳамчунин дар зарфи 6 моҳи соли ҷорӣ ҳолатҳои одамрабоӣ (16,7%), роҳзанӣ (50%), таҷовуз ба номус ва суиқасд ба он (13,6%) низ афзудааст.
Шумори ҷиноятҳои иқтисодии сабтшуда, ки асосан ба саркашӣ аз пардохти андоз марбутанд, ба андозаи 6,2% зиёд шудааст.
Бақаййдгирии ҷиноятҳои марбут ба порагирӣ ба андозаи 3,8% – аз 52 ҳолат дар нимсолаи аввали соли 2022 то ба 54 ҳолат дар соли ҷорӣ боло рафтааст.
Дар муқоиса бо моҳҳои январ-июни соли 2022 сабти ҷиноятҳо дар маҷмӯъ 7% коҳиш ёфтааст – аз 12,5 ҳазор то 11,6 ҳазор ҳолат.
Дар ин давра ба миқдори 11,7% – аз 2825 то 2497 ҳодиса камтар ҷиноятҳои вазнин ба қайд гирифта шудааст.
Дар сохтори минтақавӣ сабти ҷиноятҳо дар ВМКБ (16%) нисбатан камтар шудааст. Дар вилояти Хатлон содир шудани ҷиноятҳо 9,6%, Ноҳияҳои тобеи марказ – 8,8%, шаҳри Душанбе – 7,1% ва вилояти Суғд – 1,6% коҳиш ёфтааст.
