Алиризо Ҳақиқиён, сафири нави Эрон дар Тоҷикистон таъйин шуд ва ӯ дирӯз, 27-уми август, ба Душанбе омад. Дар ин бора хабаргузории “Форс-нюс” иттилоъ медиҳад.
Ба гуфтаи манбаъ, сафири нави Эронро намояндагони Вазорати корҳои хориҷии Тоҷикистон, кормандони сафорат ва дигар ниҳодҳои эронии муқими Тоҷикистон истиқбол гирифтанд.
“Дар мулоқоте, ки миёни Ҳақиқиён ва намояндаи Вазорати корҳои хориҷии Тоҷикистон сурат гирифт, изҳори умедворӣ шуд, ки бо ҳузури сафири нави Эрон, роҳи равобит ва ҳамкориҳои мутақобилаи ду кишвари ҳамзабону ҳамфарҳанг дар соҳаҳои гуногун бо ҷиддият ва ғайратмандона пеш гирифта мешавад”, – навиштааст манбаъ.
Ҳақиқиён аз ин пеш мудири куллу дастёри вазир дар умури АвруОсиёии вазорати умури хориҷа, мушовири амниятии вазири умури хориҷа, кордори Эрон дар Ироқ, сафири Эрон дар Арманистон ва сафири Эрон дар Покистон буд.
Ӯ ба ҷои Муҳаммадтақии Собирӣ сафири нави Эрон дар Тоҷикистон таъйин шуд.
Ёдовар мешавем, ки Муҳаммадтақии Собирӣ моҳи марти соли 2019 ба ҳайси сафири Эрон дар Тоҷикистон таъйин гардида буд ва то моҳи августи соли 2023 дар ин вазифа монд.
