Барои нахустин бор беш аз 100 варзишгар Тоҷикистонро дар Бозиҳои тобистонаи осиёӣ дар шаҳри Ханчжоуи Чин муаррифӣ мекунанд. Дар ин бора Дилшод Назаров, ноиби президенти Кумитаи миллии олимпии Тоҷикистон ба “Азия-Плюс” иттилоъ дод.
Ба гуфтаи ӯ, ин мусобиқа рӯзи 23-юми сентябр оғоз мешавад ва дар он варзишгарон аз рӯйи 40 намуди варзиш қувваозмоӣ мекунанд. Дар 18 намуди он варзишгарони тоҷик ширкат мекунанд.
“Аксари федератсияҳои варзишии Тоҷикистон аллакай ҳайати дастаҳои мунтахаби миллиро оид ба намудҳои худ эълон кардаанд”, – гуфт Дилшод Назаров.
Ӯ афзуд, бори аввал аст, ки ба ҳайати тими Тоҷикистон оид ба муштзанӣ 13 варзишгар дар ҳамаи вазнҳо шомил аст.
Ба гуфтаи Дилшод Назаров, дар охирин бозиҳое, ки соли 2018 дар Индонезия баргузор шуд, варзишгарони Тоҷикистон 7 медал – як нуқра ва 6 биринҷӣ ба даст оварда буданд.
“Аз сабаби омодагии нокифоя ман он вақт тиллоро аз даст додам. Умедворам, ки ин дафъа варзишгарони мо медалҳои бештар, аз ҷумла медалҳои тилло ба даст оранд”, – гуфт ҳамсӯҳбати мо.
Барои нахустин бор дастаҳои мунтахаби Тоҷикистон оид ба киберспорт ва брейк данс дар арсаи байналмилалӣ муаррифӣ мешаванд.
Бозиҳои тобистонаи осиёии соли 2023 дар шаҳри Ханчжоуи Чин аз 23-юми сентябр то 8-уми октябр баргузор мешаванд.
Бояд гуфт, дар он варзишгарон барои 481 медал аз рӯи 40 намуди варзиш мусобиқа мекунанд.
Ёдовар мешавем, ки Тоҷикистон аз соли 1994 то ба имрӯз дар 7 Бозиҳои осиёӣ ширкат карда, 28 медал ба даст овардааст, ки 4-тоаш тилло мебошад.
Се бор ҷоизаи олии Бозиҳои осиёиро Дилшод Назаров дар гурзандозӣ дар солҳои 2006, 2010 ва 2014 ба даст оварда буд ва муштзан Ҷаҳон Қурбонов соли 2006 дар Қатар як медали тилло ба даст овардааст.
