Бонки осиёии рушд (БОР) рушди иқтисодии Тоҷикистонро барои солҳои 2023 ва 2024 беҳтар пешгӯӣ кардааст. Дурнамои рушди Осиё, ки 20 сентябр нашр шуд, рушди иқтисоди ҷумҳурӣ дар соли 2023-ро 6,5 дарсад ва дар соли 2024 7,0 дарсад пешбинӣ намудааст.
Дар гузориши моҳи апрели БОР соли 2023 5,5% ва соли 2024 6,5% афзоиш пешбинӣ шуда буд.
Таҷдиди назар дар пешгӯӣ ба афзоиши тақозои дохилӣ ба мол ва хидматрасонӣ, ки аз афзоиши интиқоли пул ва ҳамчунин гардиши сайёҳон ва муҳоҷирон аз Русия бармеояд, рабт дода мешавад.
“Рушди иқтисод дар ҷумҳурӣ аз 7,4% дар нимсолаи аввали соли 2022 ба 8,3% дар нимаи аввали соли 2023 расидааст. Ин ба беҳбуди соҳаҳои саноат ва хизматрасонӣ, инчунин интиқоли маблағҳои зиёди муҳоҷирони меҳнатӣ аз Русия вобаста аст”, – гуфта мешавад дар ҳисобот.
Таъкид шудааст, ки афзоиши якбораи интиқоли пул аз ҳисоби афзоиши теъдоди муҳоҷирони корӣ ба рушди ғайричашмдошти иқтисодӣ мусоидат кардааст.
Дар ҳисобот гуфта мешавад, ки интиқоли пулии қобили таваҷҷуҳ касри ҳисоби ҷориро коҳиш додааст.
Муаллифони ҳисобот тавзеҳ медиҳанд, ки касри савдо дар нимсолаи аввали соли 2023 нисбат ба ҳамин давраи соли гузашта тақрибан ду баробар афзудааст, зеро содироти мол 44,2% яъне то 0,7 миллиард доллар коҳиш ёфта, воридот 19,1%, яъне то 2,7 миллиард доллар афзоиш ёфтааст.
“Аммо интиқоли пул устувор будааст, ки касри ҳисоби ҷориро то 28,7 дарсад коҳиш дода, аз 12,4 фоизи ММД дар нимсолаи аввали соли 2022 то 7,8 фоиз дар нимсолаи аввали соли 2023, баробар кардааст”, – таъкид мешавад дар ҳисобот.
Иқтисоддонҳои БОР пешгӯӣ мекунанд, ки идомаи ҷараёни устувори интиқоли пул ба коҳиши минбаъдаи касри ҳисоби ҷорӣ мусоидат хоҳад кард.
Қобили зикр аст, ки маълумот дар бораи интиқоли маблағҳои муҳоҷирони корӣ дар Тоҷикистон махфӣ аст, ҳарчанд он сири давлатӣ нест.
Қаблан дар гузориши Бонки Ҷаҳонӣ дар бораи иқтисоди Тоҷикистон гуфта шуда буд, ки дар соли 2022 вуруди пули муҳоҷирон ба ин кишвар беш аз 5,2 миллиард долларро ташкил дода, ки нишондиҳандаи рекордӣ мебошад.
