Филми кӯтоҳи ҳунарии “Фурӯғ” бо коргардонии Одина Маҳмад, коргардони ҷавони тоҷик таҳия шудааст, дар 4-умин Фестивали ҷаҳонии филмҳои мустақили Гандҳара (Gandhara Independent Film Festival) иштирок карда, барои дарёфти ҷоиза рақобат мекунад. Фестивал аз 6-ум то 8-уми октябри соли равон дар давлати Покистон баргузор мешавад.
Ин иттилоро Одина Маҳмад тасдиқ карда, таъкид намуд, ки филми “Фурӯғ” ягона филм аз Тоҷикистон, ки дар фестивали мазкур ширкат мекунад.
“Филми “Фурӯғ” дар бахши озмунии филмҳои кӯтоҳ иштирок мекунад ва мо умедворем, ки муваффақ хоҳад буд”, – гуфт Одина Маҳмад.
Дар умум, дар фестивали мазкур аз 20 кишвари дунё 43 филм роҳ ёфтаанд ва барои дарёфти ҷоизаҳои гуногун давоми 2 рӯз рақобат мекунанд. Фестивал ба таври онлайн ҳам пахш мешавад ва бинандагон имкон доранд онро тамошо кунанд.
Ёдовар мешавем, ки филми кӯтоҳи ҳунари “Фурӯғ” аввалин кори коргардони ҷавон Одина Маҳмад аст. Муаллифи филмнома Абдулҳай Зокиров ва наворбардор Абдукарим Уроқов мебошад.
Филми мазкур аз зиндагии духтараки имконияташ маҳдуд (кар ва гунг) нақл мекунад, ки марги ногаҳонии модар ба ҳолати рӯҳии ӯ таъсири ҷиддӣ расонидааст.
Нахустнамоиши филми мазкур соли гузашта дар Душанбе баргузор шуд.
Ба гуфти коргардони филм, “Фурӯғ” ба чанд кинофестивали дигар роҳ ёфтааст ва дар назар аст, ки то охир сол дар ду кинофестивали Ҳиндустон иштирок кунад.
