Дар вилояти Суғд корҳои сохтмони вокзали роҳи оҳани “Хуҷанд аз нав барқарор карда шуд.
Бинои пешинаи якошёнаи вокзал ҳанӯз соли 2011 тахриб шуда, соли 2012 бунёди бинои чорошёнаи вокзал оғоз гардида буд.
Бо сабаби мушкили молиявӣ сохтмони бинои нави вокзал ба муддати якчанд сол мавқуф гузошта шуд.
Тавре ки ба “Азия-Плюс” як манбаъ аз Раёсати қитъаи “Роҳи оҳани Тоҷикистон” дар Суғд хабар дод, айни замон қолаби чорошёнаи бино, инчунин бинои таҳхона сохта шудааст.
Айни замон ҳаҷми корҳои иҷрошуда 70%-ро ташкил медиҳад.
Ба иттилои манбаъ, барои сохтмони бинои нави вокзали роҳи оҳан аз ҷониби КВД “Роҳи оҳани Тоҷикистон” ҳудуди 6 млн сомонӣ ҷудо шудааст.
“Бино бо таҷҳизоти муосири коммуникатсионӣ муҷаҳҳаз гардида, дар ошёнаҳои боло маҷмааи меҳмонхона, қаҳвахона, тарабхона, толори вип ва дар ошёнаҳои поёнӣ ошхона, ҳуҷраи модару кӯдак ва ҳуҷраҳои зарурӣ барои кормандон вокзал ҷойгир мешаванд", – гуфт ҳамсуҳбати мо ва илова намуд, ки дар бинои таҳхона бунёди ҷойи нигаҳдории бор дар назар аст.
Дарозии бинои нави вокзали роҳи оҳани “Хуҷанд” 60 метрро ташкил медиҳад.
Тавре ки интизорӣ меравад, маросими тантанавии ифтитоҳи он дар рӯзҳои ҷашни Рӯзи ваҳдат дар соли оянда баргузор мешавад.
Айни замон дар вилояти Суғд ҳафтае як маротиба қатораи мусофирбари хатсайри “Хуҷанд- Волгоград” амал мекунад.
Ёдрас мекунем, ки ба сурати умум дар ҷумҳурӣ 30 истгоҳи роҳи оҳан амал мекунанд.
