Бар асари зарбаҳои Исроил ба Навори Ғаззаи Фаластин 1055 нафар ҳалок шуда, боз зиёда аз 5,1 ҳазор нафар маҷрӯҳ шуданд. Дар ин бора шабакаи телевизионии Al-Hadath бо истинод ба Вазорати тандурустии Фаластин хабар медиҳад.
Бино ба маълумоти ахир, дар Исроил бар асари ҳамлаҳои Ҳамос 1,2 ҳазор нафар ҳалок шуда, ҳудуди 3 ҳазор нафар ҷароҳат бардоштаанд.
Артиши дифои Исроил (ЦАХАЛ) ба ҳамлаҳои густарда ба навори Ғазза пас аз ҳамлаи аъзои Ҳамос ба ҷануби Исроил, кушта шудани низомиён ва гаравгонгирии ғайринизомиён оғоз кард. Сарвазири Исроил Бинёмин Нетаняҳу ваъда дод, ки артиш ҳама маконеро, ки дар онҳо гурӯҳи фаластиниён ҷойгир аст, "ба харобазор табдил хоҳад дод".
Рӯзи 10 октябр вазири мудофиа Йоав Галант эълон кард, ки Исроил ба як ҳамлаи густурда шурӯъ мекунад ва пас аз он “Ғазза ҳеҷ гоҳ мисли пештара нахоҳад буд". Ба ҷуз амалиёти ҷангӣ, ӯ фармон дод, ки интиқоли обу неруи барқ ва маводи сӯзишворӣ ба Навори Ғазза қатъ карда шавад.
Президенти ИМА Ҷо Байден дар як сӯҳбати телефонӣ бо Нетаняҳу аз ӯ хост, то шумори қурбониёни ғайринизомииро дар Навори Ғазза ба ҳадди ақалл бирасонанд. Сарвазири Фаластин Муҳаммад Штайё зикр кард, ки бар асари бомбафканӣ ва муҳосира аз ҷониби Исроил, навори Ғазза ба фалокати башардӯстона дучор шудааст.
Бино ба маълумоти СММ, аз оғози даргирӣ тақрибан 264 ҳазор фаластинӣ маҷбур шудаанд, ки хонаҳои худро дар Навори Ғазза тарк кунанд.
