Имрӯз, 26-уми октябр, Қоҳир Расулзода, сарвазири Тоҷикистон ҷиҳати иштирок дар ҷаласаи Шӯрои сарони ҳукуматҳо-сарвазирони давлатҳои аъзои Созмони ҳамкории Шанхай (СҲШ), ки дар Бишкек баргузор мешавад, ба Қирғизистон сафар кард.
Қоҳир Расулзодаро дар фурудгоҳи Бишкек ҳамтои қирғизаш муовини раиси Девони вазирони Қирғизистон Бақит Торобоев пешвоз гирифт.
Ҳамчунин, ба Бишкек барои иштирок дар ин ҷаласа роҳбарони ҳукуматҳои Беларус, Қазоқистон, Чин, Муғулистон, Русия, Ӯзбекистон, ноиби раиси ҷумҳури Эрон, муовини сарвазири Туркманистон, вазирони корҳои хориҷии Ҳиндустон ва Покистон низ ташриф овардаанд.
Мавзӯи асосии ҷаласаи 22-юми Шӯрои сарони ҳукуматҳо-сарвазирони давлатҳои аъзои Созмони ҳамкории Шанхай баррасии масъалаҳои такмили ҳуҷҷатҳои консептуалии қаблан қабулшуда гуфта мешавад.
Инчунин, дар назар аст, ки барномаи ҳамкории бисёрҷонибаи тиҷоратию иқтисодии давлатҳои аъзои созмон то соли 2035 низ мавриди баррасӣ қарор дода шавад.
Дар ҷаласаи охирини Шӯрои сарони давлатҳои СҲШ, ки моҳи июли соли ҷорӣ дар Ҳиндустон баргузор шуд, Стратегияи ҳамкории иқтисодӣ то соли 2030 қабул гардида буд.
Иштирокдорони ҷаласаи имрӯза доир ба такмили мундариҷаи ин ду ҳуҷҷати барномавӣ мубодилаи афкор менамоянд.
Дар назар аст, ки дар доираи ин ҷаласа мулоқоти Президенти Қирғизистон бо сарвазирон ва ҳайатҳои кишварҳои аъзои СҲШ баргузор гардад.
