Вазорати маорифи Русия тасмим гирифтааст сатҳи донистани забони русии кӯдакони муҳоҷиронро дар мактабҳои он кишвар санҷиш кунад. Дар ин бора нашрияи "Коммерсантъ" хабар медиҳад.
Баъд аз анҷоми санҷиши кӯдакони хонаводаҳои муҳоҷир мумкин аст, бархе аз онҳо ба давраҳои иловагии омӯзиши забони русӣ фиристода шаванд. Дар ин бора Сергей Кратсов, вазири маорифи Русия хабар додааст.
Қаблан роҳбари Шӯрои назди президенти Русия оид ба ҳуқуқи инсон Валерий Фадеев гуфта буд, аз 50% то 75% кӯдакони муҳоҷирон забони русиро бад ва ё умуман намедонанд. Фадеев гуфта буд, дар мактабҳои Москва ва Петербург то 20% чунин кӯдакон ҳастанд.
Ба ҷуз аз санҷиши сатҳи забондонӣ кӯдакони муҳоҷиронро ҳамчунин аз санҷишҳои “худогоҳӣ” ва “дониши таърих ва фарҳанги Русия” мегузаронанд.
Мудири Маркази лоиҳакашии иҷтимоии “Платформа” Алексей Фирсов аз ин санҷишҳо интиқод кардааст.
Коршиносон ва омӯзгороне, ки дар маҷмуъ аз ин нақшаҳои вазорати маорифи Русия ҷонибдорӣ мекунанд, ҳамзамон мепурсанд, ки – дарсҳои иловагиро кӣ пардохт хоҳад кард.
“Ба эҳтимоли зиёд аз мактабҳо талаб мешавад, ки дарсҳои иловагиро ба роҳ монанд ва мудир дар навбати худ маҷбур мешавад, ки таҳсилоти пулакиро ҷорӣ кунад”, – гуфтааст Всеволод Луховитский, узви шӯрои иттиҳодияи “Омӯзгор”.
