Чанд дақиқа пеш роҳи Душанбе-Чаноқ, ягона роҳе ки шимоли кишварро ба марказ мепайвандад баста шудааст. Дар ин бора филиали ширкати "Инновейтив Роуд Солюшнз ЛТД" дар Тоҷикистон, ки масъули ҷамъоварии маблағ ва нигоҳубини ин роҳ аст, хабар додааст.
Манбаъ навиштааст, ки сабаби баста шудани роҳ “рух додани садама дар дохили нақби Дустӣ (минтақаи Майхура)” мебошад. Дар бораи тафсилоти садама иттилоъ дода намешавад.
Масъулини ин ширкат гуфтаанд, ки кормандонашон “фавран ба маҳалли ҳодиса сафарбар шуда, барои бартарафсозии пайомади садамаи нақлиётӣ тадбирандешӣ доранд. Баробари кушода шудани роҳ, ҳатман иттилоъ хоҳем дод”.
Ин ширкат гуфтааст, ки тафсилоти садама дертар нашр хоҳад шуд.
Роҳи Душанбе –Чаноқ ягона роҳе аст, ки маркази кишварро бо шимол мепайвандад. Ҳамасола бо фаро расидани зимистон, дар пайи боришоти барфу фаромадани тарма, садамаҳои мудҳиш ё фуромадани сангу садамаи мошинҳои ҳомили газ ин роҳ барои муддате баста мешавад.
Аз ҷумла, чанде пеш дар пайи фаромадани куҳпора роҳ давоми чанд соат баста шуда буд.
