Дар шаҳри Душанбе олимпиада аз рӯи 13 фанни таълимӣ байни хонандагони муассисаҳои таҳсилоти миёнаи умумӣ оғоз гардид. Дар ин бора ба “Азия-Плюс” аз Сараёсати маорифи шаҳри Душанбе иттилоъ доданд.
Бино ба иттилои манбаъ, дар даври шаҳрии олимпиадаи фаннӣ аз чор ноҳияи пойтахт 5 ҳазору 769 довталаб – 3 ҳазору 783 нафар аз фанҳои ҷамъиятӣ-гуманитарӣ ва 1 986 нафар аз фанҳои табиӣ-риёзӣ иштирок мекунанд.
Гуфта мешавад, ки олимпиада тибқи Низомномаи олимпиадаҳои фаннӣ, ки бо қарори мушовараи Вазорати маориф ва илм тасдиқ гардидааст, баргузор шуда, беҳтаринҳо ба даври ҷумҳуриявӣ роҳхат мегиранд.
Ҳадафи баргузории олимпиада баланд бардоштани шавқу рағбати хонандагон ба омӯзиши илмҳои табиатшиносӣ, дақиқ ва риёзӣ ва рушди зеҳнии хонандагони болаёқат аст.
Олимпиада рӯзи 2-юми январи соли 2024 дар пойтахт оғоз гардида, то 6-уми январ идома меёбад.
