Мавсума Муинӣ, ки тобистони соли гузашта вакили парлумон интихоб шуда буд, имрӯз, ба ҷои Дилрабо Мансурӣ, ки чанд рӯз пеш ноиби сарвазири кишвар таъин шуд, муовини раиси парлумони Тоҷикистон интихоб шудааст. Дар ин бора сомонаи Маҷлиси намояндагони Маҷлиси Олӣ хабар медиҳад.
Манбаъ менависад, ки Мавсума Муинӣ, имрӯз, 7-уми феврал дар иҷлосияи панҷуми парлумон, ки таҳти раёсати Маҳмадтоир Зокирзода, раиси Маҷлиси намояндагон баргузор шуд, интихоб гардид.
Муовини нави раиси парлумон ҳамчунин, ба ҳайати Шӯрои Маҷлиси намояндагони Маҷлиси Олии Тоҷикистон интихоб шуда, аз ҳайати Кумитаи парлумон оид ба тартиботи ҳуқуқӣ, мудофиа ва амният хориҷ шуд.
Ҳамчунин, вакилони парлумон дар ҷаласаи имрӯза фармони президент дар бораи таъин намудани Фирдавс Толибзода ба ҳайси раиси Бонки миллӣ ва муовинони ӯ Фирӯз Шарифзода ва Сироҷиддин Икромиро тасдиқ карданд.
Зимнан, худи ҳамин рӯз, 7-уми феврал Мавсума Муинӣ, муовини нави раиси парлумон бо кормандони Дастгоҳи Маҷлиси намояндагон ҷаласаи корӣ баргузор кардааст.
Дар ҷаласа, ӯ Манижа Расулзодаро ки тоза бо амри раиси парлумон муовини якуми Роҳбари Дастгоҳи Маҷлиси намояндагон таъин гардид, муаррифӣ кардааст. Манижа Расулзода то ин дам мудири шуъбаи ташкилии Дастгоҳи Маҷлиси намояндагон буд.
Мавсума Муинӣ, ки солҳои 2017-2022 муовини раиси шаҳри Душанбе буд, соли 2022 раиси шаҳри Бӯстон таъин гардид ва то соли 2023 дар ин курсӣ кор кард. Соли 2023 номзадии ӯ барои дарёфти курсӣ дар парлумон аз ҳавзаи якмандатии Хуҷанд №13 ба ҷои Галбаҳор Назирӣ, ки муовини раиси Бонки миллии Тоҷикистон таъин гардида буд, пешниҳод шуд ва ҳамин тариқ, ба ҷои Назирӣ вакили парлумон интихоб шуд.
Мавсума Муинӣ яке аз кадрҳое гуфта мешавад, ки дар синни ҷавонӣ ва як муддати кӯтоҳ ба вазифаҳои баланди давлатӣ расид.
Ӯ 42 сол дорад ва хатмкардаи Донишгоҳи ҳуқуқ, бизнес ва сиёсати Тоҷикистон бо ихтисоси ҳуқуқшинос аст.
Баъди чанд соли кор дар Донишгоҳи ҳуқуқ, бизнес ва сиёсат бо қарори ҳукумати кишвар соли 2009 аввал муовини раиси Кумитаи кор бо ҷавонон, варзиш ва сайёҳии Тоҷикистон ва баъдан муовини аввали раиси ин ниҳод кор кардааст.
