Зимни суханронӣ дар муколамаи соҳавӣ дар бораи иқлим дар доираи Конфронси 29-уми ҷонибҳои Конвенсияи қолабии СММ оид ба тағйирёбии иқлим (СОР29) раиси Кумитаи ҳифзи муҳити зисти Тоҷикистон Баҳодур Шерализода изҳор намуд, ки то соли 2050 минтақаи Осиёи Марказӣ метавонад аз сеяки пиряхҳои худ маҳрум шавад.
Ӯ зикр кард, ки дар Тоҷикистон зиёда аз 10 ҳазор пиряҳо мавҷуданд, ки 60%-и захираҳои оби минтақаро таъмин мекунанд.
“Обшавии тези пиряхҳо ба амнияти обӣ, озуқаворӣ ва энергетикии тамоми минтақа хатар дорад, – иброз дошт ӯ – Тайи 30-40 соли ахир зиёда аз 1000 пиряхҳо дар ҷумҳурӣ об шуданд”.
Президенти Бонки осиёии рушд Масатсугу Асакава дар навбати худ дар бораи нақшаҳои сармоягузорӣ ба минтақа дар ҳаҷми 3,5 млрд доллар дар давоми 7 сол ба ташабусҳои марбут ба ҳифзи пиряхҳо ва рушди устувори бахши кишоварзӣ маълумот дод.
Намояндагони шарикони минтақавӣ, аз ҷумла вазири экологияи Озарбойҷон Мухтор Бобоев муҳим будани тарзи ягонаи муносибат ба ҳалли мушкили обшавии пиряҳоро таъкид карданд. Бад шудани вазъи иқлим ва камшавии пиряхҳо ба камбуди об боис гардида, ба соҳаи кишоварзӣ ва низомҳои экологӣ дар Осиёи Марказӣ ва Қафқоз таъсири манфӣ мерасонанд.
Қарорҳои муҳими дар форум қабулшуда аз ҷонибдории кишварҳои минтақа ба ҳифзи пиряхҳо ва идоракунии устувори захираҳои об гувоҳӣ медиҳанд.
