Вазири нақлиёти Тоҷикистон дар як чорабинӣ дар Маскав масъалаи барқарор кардани рафтуомад тариқи роҳи оҳан ва автобус, инчунин танзими нархи интиқоли молу коло бо Русия ва тариқи ин кишвар ба дигар давлатҳоро баррасӣ кардааст.
Сомонаи расмии Вазорати нақлиёти Тоҷикистон менависад, ки вазир Азим Иброҳим рӯзи 21-уми ноябр зимни мулоқот бо Роман Старовойт, вазири нақлиёти Русия дар ҳошияи Форуми байналмилалии “Нақлиёти Русия – 2024” масъалаи аз нав барқарор кардани хатсайри мусофирбари роҳи оҳан тариқи “Душанбе – Маскав”-ро баррасӣ кардааст.
Равуо тариқи роҳи оҳан дар масири “Душанбе–Маскав” ҳанӯз соли 2020 дар замони пандемияи COVID-2019 қатъ гардида буд. Ҳоло қатора аз Душанбе танҳо то Волгоград меравад.
Ҳамсояҳои Тоҷикистон, ки чанд сол бо Маскав хатсайр надоштанд, дубора онро барқарор карданд. Нахустин хатсайри роҳи оҳан дар масири “Тошканд – Маскав” рӯзи 24-уми сентябри соли ҷорӣ ба пойтахти Русия рафт.
Вазири нақлиёти Тоҷикистон дар ин мулоқот ҳамчунин, масъалаи кушодани хатсайри автобуси “Душанбе – Маскав”, “Бохтар – Маскав”, “Хуҷанд – Қазон”, “Хуҷанд – Маскав” ва “Хуҷанд – Екатеринбург”-ро махсус зикр кардааст.
Зимнан, вазорати нақлиёти Русия навиштааст, ки ҷонибҳо дар бораи роҳандозӣ кардани хатсайри автобус миёни шаҳрҳои Хуҷанд ва Новосибирск ба тавофуқ расидаанд.
Ҳарчанд санаи дақиқи оғози ин хатсайр ҳанӯз маълум нест, вале зикр мешавад, ки “он дар рӯзҳои наздик роҳандозӣ хоҳад шуд”.
Аз Вазорати нақлиёти Тоҷикистон ба мо ваъда карданд, ки санаи дақиқи роҳандозӣ кардани ин хатсайр ва нарх ҷадвали равуоро пагоҳ, 26-уми ноябр пешниҳод мекунанд.
Дар мулоқоти Азим Иброҳим ва Роман Старовойт ҳамчунин, масоили зиёд кардани рухсатномаҳои транзитӣ, иҷозати ҳаракати воситаҳои нақлиёти боркаши Тоҷикистон тавассути дигар нуқтаҳои убури сарҳади байни Русия ва Беларус мавриди баррасӣ қарор гирифтаст.
Вазири нақлиёти Тоҷикистон ба Русия пешниҳод кардааст, ки нархи хизматрасонии интиқоли борҳои воридотию содиротӣ бо нақлиёти роҳи оҳан, ки аз Тоҷикистон тавассути қаламрави Русия мегузарад, коҳиш дода шавад.
“Бо дарназардошти чолишҳои муосир Ҷумҳурии Тоҷикистон ба рушди нақлиёти шаҳрӣ ва ҷорӣ намудани низоми рақамӣ дар соҳаи нақлиёт аҳамияти калон медиҳад. Ба манзури ин, инчунин таҷрибаи ғании ҷониби Русия, мо ба ҳамкорӣ бо шумо дар ин самт манфиатдорем” – гуфтааст Азим Иброҳим
Моҳи ноябри соли пеш сарони ду кишвар вобаста ба соҳаи нақлиёт як қатор санадҳо имзо карда буданд. Аз ҷумла, нақшаи тарбирҳои амалии “Харитаи роҳ” барои солҳои 2023-2025 ба имзо расида буд.
Қаблан, байни шаҳрҳои Тоҷикистон ва Русия барои интиқоли мусофирон ва молу коло хатсайрҳои роҳи оҳан ва автобус фаъол буд. Вале дар замони пандемияи COVID-2019 аксари онҳо қатъ гардиданд. Давоми солҳои охир як қатор хатсайрҳои автобус барқарор шуданд.
