Бино ба маълумоти Speedtest Global Index дар давраи моҳҳои сентябр-ноябр, аз лиҳози суръати интернети ноқилӣ Тоҷикистон миёни 155 кишвар дар мақоми 121-ум қарор дорад. Суръати миёнаи боргузорӣ (загрузка) 30,55 Мбит/с-ро ташкил медиҳад, ки нисбат ба сатҳи ҷаҳонии 95 Мбит/с ба таври назаррас кам аст.
Инчунин мавқеи Тоҷикистон дар муқоиса бо кишварҳои ҳамоя низ хеле паст аст: Ӯзбекистон (зинаи 73-юм, 79 Мбит/с), Қирғизистон (зинаи 84-ум, 73 Мбит/с) ва Қазоқистон (зинаи 89-ум, 66 Мбит/с).
Пешсафони радабандии ҷаҳонии интернети ноқилӣ Сингапур (324 Мбит/с), Гонконг (302 Мбит/с) ва Амороти Муттаҳидаи Араб (301 Мбит/с) дониста шудаанд.
Маълумот дар бораи суръати миёнаи интернети мобилӣ дар Тоҷикистон дар давраи моҳҳои сентябр-ноябр пешниҳод нашудааст.
Аммо дар моҳи феврали соли 2024 Тоҷикистон миёни 143 кишвар дар мақоми 139-ум ва моҳи май – дар зинаи 143-юм қарор гирифта буд.
Маълум нест, ки баъди он боз дигар кишварҳо буданд ё Тоҷикистон дар зинаи охирин ҷой гирифта буд.
Дар радабандии ҷаҳонӣ суръати миёнаи ҷаҳонӣ аз рӯи интернети мобилӣ 62 Мбит/сонияро ташкил медиҳад. Пешсафон дар ин самт Амороти Муттаҳидаи Араб (442 Мбит/с), Қатар (358 Мбит/с) ва Кувейт (264 Мбит/с) зикр шудаанд.
Дар минтақа Тоҷикистон аз рӯи нишондиҳандаҳои интернети мобилӣ низ қафо монда, дар муқоиса бо кишварҳое чун Қазоқистон (54 Мбит/с), Ӯзбекистон (38 Мбит/с) ва Қирғизистон (40 Мбит/с) дар зинаи поинтар ҷойгир шудааст.
