Президенти Тоҷикистон Эмомалӣ Раҳмон ва раиси Маҷлиси миллии Маҷлиси Олии Тоҷикистон, раиси шаҳри Душанбе Рустами Эмомалӣ аз парваришгоҳи ниҳол ва гулу буттаҳои нодири ҶДММ “Кишвари сабз” боздид намуданд.
Тавре ки хадамоти матбуоти сарвари давлат хабар медиҳад, масоҳати замини хоҷагӣ 45 гектарро ташкил дода, дар ҳудуди он зиёда аз 100 намуди гулу буттаҳои нодир ва 40 намуди ниҳоли дарахтони ороишӣ, ки тухмии онҳо аз дохил ва хориҷи кишвар оварда шудаанд, бо тавсияи олимон кишту парвариш карда мешаванд.
Гуфта мешавад, мақсад аз ташкили кор дар хоҷагӣ мутобиқсозии навъу намудҳои гулу бутта ва ниҳоли дарахтон ба иқлими Тоҷикистон мебошад. Аз ин рӯ, дар масоҳати 2 гектару 20 садяк замин дар хоҷагии гулпарварӣ гармхона бо насби технологияи муосир бунёд ёфтаааст. Дар гармхона ниҳоли дарахтон ва гулу буттаҳои гармидӯст парвариш ва ба иқлими Тоҷикистон мутобиқ карда мешаванд.
“Эмомалӣ Раҳмон ба фаъолияти гулпарварон ва маҳсули заҳмати онҳо баҳои баланд дода, коргаронро ба вусъат додани ин таҷрибаи ибратбахш, зиёд намудани мутахассисон ва муассисаҳои гулпарварӣ, аз ҷумла дар дигар гӯшаҳои кишвар ҳидоят намуданд”, – омадааст дар хабари хадамоти матбуоти сарвари давлат.
Президенти кишвар супориш дод, ки бо истифода аз заминаи мусоиди чунин парваришгоҳҳо барои ободонию сабзкорӣ ва боз ҳам зебову дилнишин гардонидани боғу гулгаштҳо, кӯчаву хиёбонҳои шаҳри Душанбе ва ноҳияҳои атрофи он аз шароиту имконоти мавҷуда самаранок истифода баранд.
Ёдрас мекунем, ки дар Тоҷикистон Барномаи миллии “Кишвари сабз” барои солҳои 2023-2027” ва “Барномаи давлатии сабзкории Тоҷикистон барои давраи то соли 2040” қабул шудааст, ки ҷиҳати дар оянда ба воқеан ҳам ба як кишвари сарсабз табдил ёфтани Тоҷикистон мусоидат мекунад.
